जिल्हाधिकारी प्रसाद यांची नाशिक मध्यवर्ती कारागृहास भेट, 2027 मध्ये कारागृह स्थापनेची 100 वर्षे पूर्ण करणार

कारागृहातील सोईसुविधा समाधानकारक असून त्यात अधिक वाढ करण्यासाठी सर्वोतोपरी सहकार्य करण्यात येईल असे जिल्हाधिकारी म्हणाले..

पोलीस वार्ता, नाशिक : नाशिक मध्यवर्ती कारागृहाचा ऐतिहासिक वारसा लक्षात घेता, या कारागृहाने देशाच्या स्वातंत्र्यलढ्यात मोलाची भूमिका बजावली आहे. स्वातंत्र्यसैनिक व थोर समाजसुधारक साने गुरुजी यांनी येथे कारावास भोगलेल्या बॅरकची पाहणी आज दि.18 डिसेंबर रोजी जिल्हाधिकारी आयुष प्रसाद यांनी नाशिक मध्यवर्ती कारागृहास भेट देऊन केली व साने गुरुजी यांच्या स्मृतींना यावेळी श्रद्धांजली अर्पण केली. तसेच कारागृहातील विविध विभागांची पाहणी यावेळी जिल्हाधिकार्यांनी जिल्हा कारागृह अधीक्षक अरूणा मुगुटवार यांच्या सोबत केली.

लवकरच नाशिक जिल्हा मध्यवर्ती कारागृह 2027 मध्ये त्याच्या स्थापनेची 100 वर्षे पूर्ण करणार आहे. त्याच अनुषंगाने मध्यवर्ती कारागृह अधिक सक्षम, आधुनिक व आदर्श सुधारगृह म्हणून विकसित करण्यासाठी नियोजन करण्याच्या सूचना जिल्हाधिकारी आयुष प्रसाद यांनी दिल्या आहेत. सध्या कारागृहातील बंदीवानाना अधिक सुविधा देण्यासाठी आवश्यक उपाययोजनांची माहिती कारागृह अधीक्षकांनी दिली. कारागृहातील व्यवस्था, सोईसुविधा समाधानकारक असून त्यात अधिक वाढ करण्यासाठी सर्वोतोपरी सहकार्य करण्यात येईल असे जिल्हाधिकारी म्हणाले.

कारागृह प्रशासनाच्या कामकाजाचा दर्जा अधिकाधिक सुधारण्यासाठी जिल्हाधिकारी स्तरावरून नियमित आढावा घेण्यात येईल तसेच कैद्यांच्या सुधारणा व पुनर्वसनाच्या दृष्टीने शिक्षण, कौशल्यविकास, आरोग्य सुविधा, स्वच्छता, मानसिक समुपदेशन तसेच विविध सुधारात्मक उपक्रम अधिक प्रभावीपणे राबविण्यावर भर देण्यात येणार असल्याचे जिल्हाधिकाऱ्यांनी स्पष्ट केले. सर्व संबंधित यंत्रणांच्या समन्वयातून नाशिक मध्यवर्ती कारागृह देशातील आदर्श सुधारगृह म्हणून नावारूपास आणण्याचे प्रयत्न करण्यात येतील असे ते पुढे म्हणाले.