नशिराबाद, ता. जळगाव : नशिराबाद पोलिसांनी गुप्त माहितीच्या आधारे वेश्याव्यवसायावर धडक कारवाई करत दोन आरोपींना अटक केली असून, दोन पीडित महिलांची सुटका केली आहे. या कारवाईत ९१ हजार ६० रुपयांचा मुद्देमाल जप्त करण्यात आला.
सहायक पोलिस निरीक्षक योगिता नारखेडे यांना २१ जुलै रोजी नशिराबाद ते सुनसगाव रस्त्यालगत असलेल्या एका शेतात वेश्याव्यवसाय सुरू असल्याची गुप्त माहिती मिळाली होती. त्यानुसार पोलिस पथकाने खाजगी पंटरमार्फत माहितीची खातरजमा करून दुपारी सुमारे २.२० वाजता छापा टाकला. कारवाईदरम्यान प्रदीप जनार्दन रोटे (वय ५७) व कैलास संजय भोई (दोघे रा. नशिराबाद) यांच्या सांगण्यावरून त्या ठिकाणी कुंटणखाना सुरू असल्याचे निष्पन्न झाले.
या प्रकरणात दोन्ही आरोपींना अटक करण्यात आली असून, दोन पीडित महिलांची सुटका करण्यात आली आहे. तसेच गुन्ह्याशी संबंधित ९१ हजार ६० रुपयांचा मुद्देमाल जप्त करण्यात आला.
याप्रकरणी नशिराबाद पोलीस ठाण्यात अनैतिक मानवी व्यापारास प्रतिबंध अधिनियमाच्या कलम ३, ४, ५ व ७ अन्वये गुन्हा दाखल करण्यात आला असून, पुढील तपास सहायक पोलिस निरीक्षक योगिता नारखेडे करीत आहेत.
