भुसावळ – येथील संतोषी माता हॉल येथे आयोजित करण्यात आलेल्या ‘छत्रपती शिवाजी महाराज महाराजस्व समाधान शिबिर अभियाना’ दरम्यान भुसावळ पोलीस प्रशासनातर्फे वाहतूक सुरक्षा व नियमांबाबत प्रभावी जनजागृती उपक्रम राबविण्यात आला.
सदर कार्यक्रम मा. उपविभागीय पोलिस अधिकारी यांच्या मार्गदर्शनाखाली पार पडला. या शिबिरात भुसावळ शहर पोलीस स्टेशनचे पोलीस निरीक्षक, बाजारपेठ पोलीस स्टेशनचे पोलीस निरीक्षक तसेच भुसावळ शहर वाहतूक शाखेचे अधिकारी व कर्मचारी यांनी उत्स्फूर्त सहभाग नोंदवला.
उपक्रमाची मुख्य वैशिष्ट्ये:मार्गदर्शक बॅनर व फलक:
शिबिर स्थळी येणाऱ्या नागरिकांना रस्ते सुरक्षा व वाहतूक नियमांची सुलभ माहिती व्हावी, यासाठी विविध जनजागृतीपर बॅनर लावण्यात आले होते.
नागरिकांना थेट मार्गदर्शन: वाहतूक शाखेतर्फे दोन पोलीस अंमलदारांची विशेष नेमणूक करण्यात आली होती. त्यांनी शिबिरास उपस्थित नागरिकांना वाहतूक नियमांचे पालन करण्याचे महत्त्व, हेल्मेट व सीटबेल्टचा वापर, आणि रस्ते सुरक्षेचे नियम यांबाबत सविस्तर माहिती देऊन मार्गदर्शन केले.
नागरिकांमध्ये वाहतूक शिस्त निर्माण व्हावी आणि अपघातांचे प्रमाण कमी व्हावे, या उद्देशाने भुसावळ पोलीस प्रशासनाकडून हा उपक्रम राबवण्यात आला. शिबिरात उपस्थित नागरिकांनी या उपक्रमाचे मनापासून स्वागत केले.
