नवी मुंबई आग दुर्घटनेत एकाच कुटुंबातील दांपत्य व त्यांच्या चिमुकलीसह एका वृद्ध महिलेचा मृत्यू

आगीत चार जणांचा मृत्यू झाला असून अनेक जणांना गुदमरल्याचा त्रास झाल्याने रुग्णालयात दाखल करण्यात आले आहे.. 

पोलीस वार्ता, नवी मुंबई : नवी मुंबईत दिवाळीत एक दुर्दैवी घटना घडली आहे. सेक्टर 14, वाशी येथे 12 मजली रहेजा रेसिडेन्सी अपार्टमेंट इमारतीत सोमवारी 20 ऑक्टोबर ला मध्यरात्रीनंतर भीषण आग लागली होती. या आगीमुळे वरच्या मजल्यांवर धुर गेल्याने अनेक रहिवासी धुराने गुदमरले होते, घटनेची माहिती मिळताच अग्निशमन दलाच्या गाड्या घटनास्थळी पोहचल्या आणि बचावकार्य सुरू झाले होते.

या भीषण आगीत रहेजा रेसिडेन्सी इमारतीच्या 12 व्या मजल्यावर राहणारे रहिवाशी सुंदर बालाकृष्णन (वय-44), त्यांची सौ.पत्नी पूजा राजन(वय-44), आणि त्यांची मुलगी वेदिका(वय-6) यांचा या घटनेत दुर्दैवी मृत्यू झाला. तसेच 10 व्या मजल्यावर राहणाऱ्या 84 वर्षीय कमला जैन या अंथरुणावरच असणाऱ्या महिलेसुद्धा या घटनेत मृत्यू झाला. यामुळे परिसरात हळहळ व्यक्त केली जात आहे.

वाशी पोलीस ठाण्याचे वपोनि. शशिकांत चांदेकर यांनी माहिती दिली की, “आगीचं नेमकं कारण अद्याप समजले नसून दिवाळीच्या दिव्यांमुळे किंवा एसीच्या इलेक्ट्रिक शॉर्टसर्किट हे याचे कारण असण्याची शक्यता आहे.” सर्व अहवाल आल्यानंतरच पुढील तपास सुरू करू असे त्यांनी सांगितले.

इमारत व्यवस्थापक संजय उबाळे यांनी दिलेल्या माहितीनुसार “आग लागल्यावर इमारतीचा वीजपुरवठा बंद झाला होता, धुरामुळे इमारतीतील रहिवाशांना गुदमरल्यासारखं वातावरण झालं होत, काही जण टेरेसकडे धावले, पण धुरामुळे परिस्थिती बिकट झाली होती. या प्रकरणात प्रशासनाकडून सखोल चौकशी केली जाणार आहे.