भुसावळ – जळगाव जिल्ह्यातील पाचोरा येथील एका तरुणाकडून भुसावळ रेल्वे स्थानकावर मोठ्या प्रमाणात सुगंधित पानमसाला व गुटखा जप्त करण्यात आला. कर्नाटक एक्सप्रेसमधून अनधिकृतरित्या गुटख्याची वाहतूक होत असल्याची गोपनीय माहिती मिळाल्यानंतर भुसावळ लोहमार्ग पोलिसांनी ही कारवाई केली.
लोहमार्ग पोलीस निरीक्षक सुधीर घायरकर यांना पाचोरा येथील एक तरुण बऱ्हाणपूरहून कर्नाटक एक्सप्रेसने गुटखा घेऊन पाचोराकडे जात असल्याची माहिती मिळाली होती. त्यानुसार सहायक पोलीस उपनिरीक्षक नितीन पाटील यांच्या मार्गदर्शनाखाली पोलीस कर्मचारी जय कोळी, धनराज लुले, विलास जाधव आणि अंकुश लांडगे यांच्या पथकाने भुसावळ रेल्वे स्थानकाच्या प्लॅटफॉर्म क्रमांक ४ वर गाडीची तपासणी केली.
तपासणीदरम्यान कर्नाटक एक्सप्रेसच्या दिव्यांग डब्यात संशयास्पद हालचाली करणाऱ्या एका तरुणाची झडती घेण्यात आली. त्याच्याकडून १७ हजार ११२ रुपयांचा सुगंधित पानमसाला तसेच त्यासोबत मिश्रित करण्यात येणारी सुगंधित तंबाखू (गुटखा) मोठ्या प्रमाणात आढळून आली. पोलिसांनी तत्काळ संबंधित मुद्देमाल जप्त करून तरुणाला ताब्यात घेतले.
या प्रकरणी भुसावळ लोहमार्ग पोलीस ठाण्यात संबंधित कायद्यानुसार गुन्हा दाखल करण्यात आला असून, जप्त केलेल्या गुटख्याची किंमत, वाहतुकीचे उद्दिष्ट आणि त्यामागील साखळीचा तपास लोहमार्ग पोलीस करीत आहेत. रेल्वेमार्गे होणाऱ्या अवैध गुटखा वाहतुकीविरोधात लोहमार्ग पोलिसांची कारवाई सुरू असून अशा प्रकारांवर कडक लक्ष ठेवण्यात येत असल्याचे पोलिसांनी सांगितले.
