कामायनी एक्सप्रेसमध्ये गुटखा वाहतूक उघड; दोन महिलांविरुद्ध लोहमार्ग पोलिसांत गुन्हा दाखल

कामायनी एक्सप्रेसमधून अवैधरित्या सुमारे 21 हजार 115 रुपये किंमतीचा गुटखा जप्त केला आहे..

पोलीस वार्ता, भुसावळ | लोहमार्ग पोलिसांनी कामायनी एक्सप्रेसमधून अवैधरित्या सुगंधित पान मसाला (गुटखा) वाहतूक करणाऱ्या दोन महिलांविरुद्ध भुसावळ रेल्वे स्थानक येथे कारवाई केली आहे. त्यांच्याकडून सुमारे 21 हजार 115 रुपये किंमतीचा गुटखा जप्त केला आहे.

भुसावळ लोहमार्ग पोलीस निरीक्षक सुधीर घायरकर यांना मिळालेल्या गोपनीय माहितीनुसार, मुंबईकडे जाणाऱ्या कामायनी एक्सप्रेस गाडी क्र- 11062 च्या जनरल डब्यातील मागील दरवाजाजवळील पहिल्या कंपार्टमेंटमध्ये दोन महिला गुटखा माल भरलेल्या बॅगा घेऊन प्रवास करत असल्याची माहिती मिळाली होती. त्यानुसार रेल्वे स्थानकावरील प्लॅटफॉर्म क्र- 4 वर सायंकाळी 4:45 वाजता गाडी आल्यानंतर लोहमार्ग पोलिसांनी संबंधित डब्याची तपासणी केली असता तपासणी दरम्यान संशयित दोन महिलांच्या ताब्यातील 5 बॅगांमध्ये सुगंधित पान मसाला/गुटखा आढळून आला.

दोन्ही महिलांना ताब्यात घेऊन भुसावळ लोहमार्ग पोलीस ठाण्यात हजर करण्यात आले. पंचनामा करून त्यांच्या ताब्यातून 21 हजार 115 रुपये किंमतीचा गुटखा जप्त करण्यात आला आहे. याप्रकरणी जयकुमार कोळी यांनी दिलेल्या फिर्यादीवरून भुसावळ लोहमार्ग पोलीस ठाण्यात संबंधित महिलांविरुद्ध गुन्हा दाखल करण्यात आला असून पुढील तपास सुरू आहे.

सदर कारवाई पोलीस निरीक्षक सुधीर घायरकर यांच्या मार्गदर्शनात सहा. पोलीस उपनिरीक्षक नितीन पाटील, जयकुमार कोळी, धनराज लुले, विलास जाधव आणि अंकुश लांडगे यांच्या पोलीस पथकाने मिळून केली आहे.