भुसावळमधून चोरलेली दुचाकी जप्त; मुक्ताईनगरचा सराईत आरोपी अटकेत!

जळगाव एलसीबी व भुसावळ पोलिसांची संयुक्त कारवाई, सुरत येथील चोरीचाही उलगडा..

पोलीस वार्ता, भुसावळ : शहरातील न्यायालय परिसरातून चोरलेली मोटारसायकल शोधण्यात जळगाव स्थानिक गुन्हे शाखा आणि भुसावळ शहर पोलिसांना यश आले आहे. या कारवाईत मुक्ताईनगर येथील एका सराईत चोरट्याला अटक करण्यात आली असून आरोपीकडून भुसावळसह गुजरात राज्यातील सुरत येथून चोरलेली अशा एकूण दोन मोटारसायकल ताब्यात घेण्यात आल्या आहेत.

नेमकी घटना काय ?

भुसावळ कोर्ट आवारातून दि. 3 फेब्रुवारी 2026 रोजी फिर्यादी ॲड.रोकडे यांची हिरोहोंडा एच.एफ.डिलक्स (क्र.एम.एच. 39/टी. 6102) दुचाकी अज्ञात चोरट्यानी चोरली होती. याप्रकरणी भुसावळ शहर पोलीस ठाण्यात भा.न्या.संहिता कलम 303(2) नुसार चोरीचा गुन्हा दाखल करण्यात आला होता. या गुन्ह्याचा तपास करण्यासाठी पोलीस अधीक्षक महेश्वर रेड्डी यांनी पोलीस पथकाला विशेष सूचना दिल्या होत्या. ​गोपनीय माहितीवरून सापळा लावून स्थानिक गुन्हे शाखेचे पोलीस निरीक्षक राहुल गायकवाड, भुसावळ शहर पोलीस निरीक्षक उद्धव डमाळे व उपविभागीय पोलीस अधिकारी केदार बारबोले यांच्या मार्गदर्शनात तपास पथकाने गोपनीय माहिती मिळवली. व माहितीच्या आधारे संशयित आरोपी किरण उर्फ करण शालीग्राम पाटील, रा- मुक्ताईनगर याला ताब्यात घेऊन त्याची कसून चौकशी केली.

आंतरराज्य गुन्हेगारी उघड..

पोलिसांनी केलेल्या चौकशीत आरोपीने भुसावळमधील चोरीची कबुली दिलीच शिवाय गुजरात राज्यातील सुरत येथूनही एक होंडा शाइन मोटारसायकल (गुन्हा क्र. 85/2026) चोरल्याचे कबूल केले. आरोपी किरण हा सराईत गुन्हेगार असून त्याच्यावर मलकापूर आणि भुसावळ बाजारपेठ पोलीस ठाण्यातही यापूर्वी चोरीचे अनेक गुन्हे दाखल आहेत.

​यांनी केली कारवाई..

ही यशस्वी कामगिरी स्था.गु.शा.जळगावचे पोहेकॉ. उमाकांत पाटील, प्रशांत परदेशी, राहुल वानखेडे, भुसावळ शहरचे सपोनि.राहुल भंडारे, पोकॉ. राहुल भोई आणि भुसावळ तालुका पोलीस ठाण्याचे नितीन चौधरी यांच्या पथकाने केली. या धडक कारवाईमुळे दुचाकी चोरट्यांचे धाबे दणाणले आहेत.