बाजारपेठ पोलीस ठाण्याकडून खुनातील फरार आरोपीला अखेर अटक!

भुसावळ शहरात खून करून सहा महिन्यांपासून फरार आरोपीला पोलिसांची इस्लामपूरा परिसरातून केली अटक..

पोलीस वार्ता, भुसावळ : शहरात सहा महिन्यांपूर्वी घडलेल्या खुनाच्या गंभीर गुन्ह्यातील फरार आरोपीला अखेर पोलिसांकडून अटक करण्यात आली आहे. ही कारवाई भुसावळ बाजारपेठ पोलीस ठाण्याच्या गुन्हे शाखेच्या पथकाने केली असून अटक करण्यात आलेल्या आरोपीचे नाव व माहिती जाकीर उस्मान शेख, रा. इस्लामपूरा, जळगाव असे आहे. आरोपी खून करून सहा महिन्यांपासून पोलिसांना चकमा देत होता.

भुसावळ शहरात या खुनाच्या घटनेमुळे एकच खळबळ उडाली होती. गुन्हा दाखल झाल्यानंतर पोलिसांनी तत्काळ तपास सुरू केला होता. मात्र, मुख्य आरोपी जाकीर शेख हा सतत ठिकाणे बदलत होता आणि फरार होत होता. आरोपीचा शोध घेण्यासाठी पोलिसांनी गुप्त बातमीदारांचे जाळे सक्रिय केले होते तसेच तांत्रिक तपासाच्या माध्यमातून त्याच्या हालचालींवर बारकाईने लक्ष ठेवले होते.

पोलीस निरीक्षक राहुल वाघ यांच्या आदेशानुसार भुसावळ बाजारपेठ पोलीस ठाण्याच्या गुन्हे शाखेचे विशेष पथक या प्रकरणात सक्रिय झाले. सहाय्यक पोलीस निरीक्षक निलेश देशमुख यांच्या मार्गदर्शनाखाली पोलिसांनी जळगाव शहरात सापळा रचत अखेर आरोपीला ताब्यात घेतले. इस्लामपूरा परिसरात तो लपून बसल्याची खात्रीशीर माहिती मिळताच पथकाने तात्काळ कारवाई करत त्याला अटक केली.

या धडक कारवाई पोलीस पथकातील हेकॉ. कांतीलाल केदारे, पोकॉ. जावेद शाह, महेंद्रसिंग पाटील, चंद्रकांत रायपुरकर आणि मोसिन शेख यांचा समावेश असून यांनी संयुक्त पणे ही कारवाई यशस्वी केली. आरोपीला अटक झाल्याने खुनाच्या प्रकरणातील सत्य उघड होणार असून, या गुन्ह्यातील इतर सूत्रधारांचा शोध घेण्याच्या दृष्टीने पोलिसांकडून सखोल चौकशी सुरू करण्यात आली आहे.