‘श्रीमंत राजे पवार घराणे सामाजिक प्रतिष्ठान’ च्या वतीने पोलीस आयुक्त प्रवीण पवार यांचा ‘गाय-वासराची प्रतिमा’ भेट देऊन सन्मान..
पोलीस वार्ता, छ.संभाजीनगर : शहराच्या इतिहासात पहिल्यांदाच अवैध गोवंश वाहतूक व कत्तल रोखण्यात एवढ्या मोठ्या प्रमाणावर शहर पोलिसांना यश मिळाले आहे. पोलीस आयुक्त मा.प्रवीण (दादा) पवार यांच्या अचूक गुप्त माहिती आणि चोख नियोजनातून शहराच्या जिन्शीसारख्या संवेदनशील भागात विशेष कोम्बिंग ऑपरेशन राबवून तब्बल 131 मुक्या जनावरांची सुटका करण्यात आली.
या धडाकेबाज कारवाई दरम्यान एक अत्यंत हृदयस्पर्शी प्रसंग घडला. कत्तलीसाठी आणलेल्या जनावरांमध्ये एक लहान वासरू आपल्या आईचे दूध पीत असल्याचे दृश्य समोर आले. मरणाच्या दारात उभी असलेली ती गाय आणि लेकराची ती ओढ पाहून, एरवी कायद्याचे कठोर पालन करणारे पोलीस आयुक्त प्रवीण पवार साहेब देखील गहिवरून गेले. खाकी वर्दीच्या आत दडलेली ही माणुसकी तिथे उपस्थित सर्वांनीच अनुभवली.
याच भावस्पर्शी प्रसंगाचे औचित्य साधून आणि या धाडसी कामगिरीबद्दल कृतज्ञता व्यक्त करण्यासाठी, आज ‘श्रीमंत राजे पवार घराणे सामाजिक प्रतिष्ठान’ च्या वतीने पोलीस आयुक्त आदरणीय प्रवीण पवार साहेब यांचा ‘गाय-वासराची प्रतिमा’ सप्रेम भेट देऊन विशेष सत्कार करण्यात आला.
