भगूर शहरामध्ये जयंतीनिमित्त भव्य शोभायात्रेचे आयोजन, यात असंख्य नागरिक, युवक, महिला व विविध संघटनांचे कार्यकर्ते मोठ्या उत्साहाने सहभागी झाले होते..
पोलीस वार्ता, देवळाली : स्वातंत्र्यवीर विनायक दामोदर सावरकर यांच्या जयंतीनिमित्त आज दि.28 मे रोजी भगूर या त्यांच्या जन्मभूमी नगरीत विविध कार्यक्रमांचे आयोजन करण्यात आले होते. सकाळी 7:00 वाजता भगूर नगरपरिषद नगराध्यक्षा सौ.प्रेरणा विशाल बलकवडे यांच्या हस्ते तसेच भगूरचे नगरसेवक, नगर परिषदेचे अधिकारी व कर्मचाऱ्यांच्या उपस्थितीत स्वा.सावरकर यांच्या प्रतिमेस पुष्पहार अर्पण करून अभिवादन करण्यात आले. यावेळी देशभक्तीपर घोषणांनी परिसर दणाणून गेला होता.
भगूर शहरामध्ये जयंतीनिमित्त भव्य शोभायात्रेचे आयोजन करण्यात आले होते. या शोभायात्रेमध्ये असंख्य नागरिक, युवक, महिला व विविध संघटनांचे कार्यकर्ते मोठ्या उत्साहाने सहभागी झाले होते. हातात भगवे ध्वज, देशभक्तीपर घोषणा आणि ढोल-ताशांच्या गजरात काढण्यात आलेल्या या शोभायात्रेने संपूर्ण शहरात उत्साहाचे वातावरण निर्माण झाले.
स्वा. सावरकरांचे भगूर हे जन्मगाव असल्याने दिवसभर येथे महाराष्ट्रासह देशाच्या विविध भागांतून नागरिक, सामाजिक कार्यकर्ते, कलाकार, अभ्यासक व सावरकर प्रेमींनी मोठ्या संख्येने भेट दिली. सावरकर वाड्यास भेट देत अनेकांनी आपल्या कला, देशभक्तीपर गीते, पोवाडे, भाषणे व सांस्कृतिक कार्यक्रमांचे सादरीकरण केले. त्यामुळे संपूर्ण भगूर नगरी देशभक्तीच्या वातावरणाने भारावून गेली होती.
