रुग्णवाहिकेत पेट्रोल संपले; मृतदेह नेताना ग्रामस्थांची धावपळ
भुसावळ : (निलेश फिरके) तालुक्यातील दर्यापूर ग्रामपंचायतीच्या रुग्णवाहिकेतून मृतदेह नेत असताना रस्त्यातच पेट्रोल संपल्याचा धक्कादायक प्रकार समोर आला आहे. (एमएच १९ सीएक्स २८०१) क्रमांकाच्या रुग्णवाहिकेचे पेट्रोल संपल्याने मृतदेह घेऊन जाणाऱ्या वाहनाला रस्त्यातच थांबावे लागले.
रुग्णवाहिका बंद पडल्यानंतर गावातील तरुणांनी अक्षरशः वाहनाला धक्का देत पेट्रोल पंपापर्यंत नेले. त्यानंतर तरुणांनी स्वतःच्या खिशातून पैसे खर्च करून रुग्णवाहिकेत पेट्रोल भरले. या प्रकारामुळे ग्रामस्थांमध्ये तीव्र नाराजी व्यक्त होत आहे.
ग्रामपंचायतीच्या रुग्णवाहिकेत आवश्यक इंधनाची व्यवस्था न ठेवता मृतदेहाची वाहतूक केल्याने हा प्रकार घडल्याचा आरोप ग्रामस्थांनी केला आहे. मृतदेह नेत असताना रुग्णवाहिका रस्त्यात बंद पडल्याने मृत व्यक्तीच्या कुटुंबीयांना व ग्रामस्थांना मनस्ताप सहन करावा लागला.
ग्रामपंचायतीच्या या भोंगळ कारभारामुळे मृतदेहाची अवहेलना झाल्याचा आरोप करत ग्रामस्थांनी संबंधितांवर कठोर कारवाई करण्याची मागणी केली आहे. रुग्णवाहिकेची नियमित देखभाल व इंधनाची उपलब्धता याकडे ग्रामपंचायत प्रशासनाने गांभीर्याने लक्ष देण्याची मागणीही होत आहे.
