मनमाड, देवळा, पेठ पोटनिवडणुकांच्या तयारीचा राज्य निवडणूक आयुक्त दिनेश वाघमारेंनी घेतला आढावा!

मनमाड नगरपरिषदेमधील 2 पदे, देवळा नगरपंचायतीतील 1 पद आणि पेठ नगरपंचायतीतील 1 पद अशा एकूण 4 रिक्त पदांसाठी पोटनिवडणुका 20 जून रोजी..

पोलीस वार्ता, नाशिक : जिल्हाधिकारी कार्यालय येथे पोटनिवडणुकांच्या अनुषंगाने दि.22 मे रोजी आढावा बैठक पार पडली यावेळी मनमाड नगरपरिषद तसेच देवळा व पेठ नगरपंचायतीतील रिक्त पदांसाठी होणाऱ्या पोटनिवडणुकीच्या तयारीचा आढावा घेण्यात आला.

बैठकीत मनमाड नगरपरिषदेमधील 2 पदे, देवळा नगरपंचायतीतील 1 पद आणि पेठ नगरपंचायतीतील 1 पद अशा एकूण 4 रिक्त पदांसाठी होणाऱ्या पोटनिवडणुकांबाबत सविस्तर चर्चा करण्यात आली. या पदांसाठी 20 जून 2026 रोजी होणाऱ्या मतदान यंत्रणेची तयारी, आवश्यक मनुष्यबळ आणि साहित्य उपलब्धतेचा आढावा घेतला गेला. राज्य निवडणूक आयुक्त दिनेश वाघमारे यांनी संबंधित क्षेत्रांतील संवेदनशील, अतिसंवेदनशील मतदान केंद्रांची स्थिती, त्या ठिकाणी करण्यात येणाऱ्या विशेष उपाययोजना तसेच निवडणूक काळातील कायदा व सुव्यवस्था व्यवस्थापनाबाबतची माहिती जाणून घेतली. मतदान केंद्रांवर मतदारांना कोणतीही अडचण येऊ नये यासाठी पिण्याचे पाणी, वीज, स्वच्छतागृह, रॅम्पसह दिव्यांगांसाठी आवश्यक सुविधा उपलब्ध करून देण्याच्या तयारीचाही त्यांनी आढावा घेतला.

मतदान प्रक्रिया शांततेत व सुरळीत पार पाडण्यासाठी सर्व विभागांनी परस्पर समन्वय राखून नियनबद्ध पद्धतीने कामकाज करावे, तसेच मतदानाच्या दिवशी मतदारांना आवश्यक सर्व सुविधा उपलब्ध करून देण्यावर विशेष भर द्यावा, असे निर्देश राज्य निवडणूक आयुक्तांनी यावेळी दिले. तसेच प्रत्येक निवडणूक केंद्रातील मतदारसंख्या, मतदान केंद्रांची संख्या, प्राप्त झालेली नामनिर्देशन पत्रे, निवडणूक प्रक्रियेसाठी आवश्यक मनुष्यबळाचे नियोजन, प्रशिक्षण व्यवस्था आणि निवडणूक साहित्याची उपलब्धता याबाबतची माहिती संबंधित अधिकाऱ्यांकडून घेण्यात आली.

यावेळी जिल्हाधिकारी आयुष प्रसाद यांनी जिल्ह्यातील नगरपरिषद पोटनिवडणूक संदर्भातील आवश्यक तयारीची माहिती दिली. पोलीस आयुक्त (ग्रामीण) डॉ. स्वामी यांनी पोटनिवडणूक अनुषंगाने कायदा व सुव्यवस्था संदर्भात केलेल्या तयारीची माहिती विषद केली. या बैठकीस जिल्हाधिकारी आयुष प्रसाद, पोलीस अधीक्षक (ग्रामीण) डॉ. डि.एस. स्वामी, उपजिल्हाधिकारी शुभांगी भारदे, नगरपालिका शाखेचे सहआयुक्त शाम गोसावी, सहा. आयुक्त स्नेहल विसपुते, मनमाड नगरपरिषदेचे मुख्याधिकारी शेषराव चौधरी, पेठ नगरपंचयातचे मुख्याधिकारी चेतन विसपुते, देवळा नगरपंचायत मुख्याधिकारी प्रमोद ढोरजकर आदी अधिकारी उपस्थित होते.