नांदूर मध्यमेश्वरच्या नोंदींनुसार, यापूर्वी हा पक्षी अभयारण्यात 2004-5 मधे बघितला गेला होता त्यानंतर बऱ्याच वर्षापासून हा दिसलेला नव्हता..
पोलीस वार्ता, नाशिक : जिल्ह्यातील निफाड तालुक्यात असलेले नांदूर मध्यमेश्वर अभयारण्य सध्या एका दुर्मिळ पक्षी दर्शनामुळे चर्चेत आले आहे. आपल्या परतीच्या प्रवासात (Return Migration) असलेल्या ‘ग्रेट व्हाईट पेलिकन’ किंवा ‘रोजी पेलिकन’ या पक्ष्यांचे दर्शन पहिल्यांदा अभयारण्यात झाले आहे.
नांदूर मध्यमेश्वरच्या नोंदींनुसार, यापूर्वी हा पक्षी अभयारण्यात 2004-5 मधे बघितला गेला होता त्यानंतर बऱ्याच वर्षापासून हा दिसलेला नव्हता, किंबहुना महाराष्ट्रात देखील अतिशय दुर्मीळ अशा या पक्ष्यांचे दर्शन झाल्याचे पक्षी अभ्यासकांचे म्हणने आहे. आज 28 मार्च 2026 ला या राजबिंड्या पक्ष्यांनी अधिकृतपणे हजेरी लावल्याने निसर्ग अभ्यासकांमध्ये उत्साहाचे वातावरण आहे.
‘रोजी पेलिकन’ का म्हणतात?
या पक्ष्याला ‘ग्रेट व्हाईट पेलिकन’ असे नाव असले तरी, विणीच्या हंगामात किंवा विशिष्ट प्रकाश झोतात त्यांच्या पांढऱ्याशुभ्र पिसांवर एक नाजूक गुलाबी (Rosy) छटा उमटते. यामुळेच त्यांना ‘रोजी पेलिकन’ असेही म्हटले जाते.
हे पक्षी हिवाळ्याच्या सुरुवातीला उत्तर गोलार्धातून दक्षिण दिशेला स्थलांतर करतात. आता मार्च महिन्याच्या शेवटी, उन्हाची चाहूल लागताच ते पुन्हा आपल्या मूळ स्थानी (युरोप आणि मध्य आशिया) परतत आहेत. या प्रवासादरम्यान विश्रांती घेण्यासाठी आणि अन्नाचा साठा करण्यासाठी त्यांनी नांदूर मध्यमेश्वरच्या अभयारण्याची निवड केली आहे.
