खोदलेल्या रस्त्यांमुळे वाहतुक कोंडीच्या समस्या तसेच या खड्ड्यांमध्ये पडून होणारे अपघात याकडे नाशिक महानगरपालिकेने पूर्णपणे दुर्लक्ष..
पोलीस वार्ता, नाशिक : आगामी 2027 नाशिक कुंभमेळ्याच्या पार्श्वभूमीवर संपूर्ण शहरभर विकास कामांच्या नावाखाली सर्वच प्रमुख रस्ते खोदून ठेवलेल्या अवस्थेत नाशिककर बघत आहे आणि यामुळे होणाऱ्या वाहतुकीच्या आणि धुळीच्या समस्यांना नाशिककर सामोरे जात आहे. याबद्दल तक्रार करणार तरी कोणाला? असा प्रश्न लोकांसमोर उभा आहे. या खोदलेल्या रस्त्यांमुळे शहरात वाहतुक कोंडीच्या समस्या वाढल्या आहेत. तसेच या खड्ड्यांमध्ये पडून होणारे लहान मोठे अपघात याकडे नाशिक महानगरपालिकेने पूर्णपणे दुर्लक्ष करून लोकांच्या जीवाशी खेळण्याचा प्रकार सध्या नाशिक शहरात चालू केला जात आहे.
नाशिकरोड परिसरातील बिटको ते जेलरोड मार्गे नांदूरनाका या रस्त्याचे गेल्या दोन-तीन वर्षापासून सतत कुठल्या ना कुठल्या कारणामुळे मोठ्या प्रमाणावर खोदकाम केले जात आहे. नाशिकरोड महानगरपालिका अधिकारी आणि ठेकेदार यांचे ऋणानुबंध तयार झाले असून ते सतत खोदकाम करण्याच्या परवानग्या देतात आणि नागरिकांच्या जीवाशी खेळतात.
बिटको ते नांदूरनाका या रस्त्यावरून जड वाहनांची वाहतूक होऊ नये यासाठी नेहमीच आंदोलने व निवेदने वाहतूक पोलिसांना देण्यात येतात. ज्याचे कारण म्हणजे या रस्त्यावर झालेले अपघात आणि झालेली जीवित हानी. जेलरोड मार्गावर नोट प्रेस, शाळा, कॉलेज, भाजीमार्केट या सर्वांमुळे कामगार व विद्यार्थ्यांची मोठी वर्दळ असते आणि महापालिकेने खोदलेल्या खड्ड्यांमुळे आणि निकृष्ट दर्जाच्या झालेल्या रस्त्यामुळे पुन्हा एकदा अपघातात काही लोकांचा जाण्याची भीती व्यक्त होत आहे. या रस्त्यावरून गाडी चालवणे कठीण झाले असून वाहतुक कोंडीचे प्रमाण देखील खूप वाढले आहे. बऱ्याच लोकांना मणक्याच्या समस्या, धुळीमुळे श्वासनाच्या समस्या उद्भवल्याचे लोकांकडून कळले आहे.
