बारामतीत राष्ट्रवादी काँग्रेसचा गुलाल! नगरपरिषदेत अजित पवार गटाचे आठ उमेदवार बिनविरोध विजयी!

उमेदवारी अर्ज मागे घेण्याच्या दिवशी 7 उमेदवार, तर छाननी नंतर 1 असे 8 उमेदवारांचा बिनविरोध विजय झाला..

पोलीस वार्ता, बारामती : स्थानिक स्वराज्य संस्थांच्या 2025-26 निवडणुकीत बारामती नगरपरिषद निवडणुकीत राष्ट्रवादी काँग्रेस पक्षाने मोठी आघाडी घेतली आहे. एकूण 41 जागांपैकी आठ जागांवर बिनविरोध उमेदवार निवडून आले आहे. उमेदवारी अर्ज मागे घेण्याच्या दिवशी 7 उमेदवार, तर छाननी नंतर 1 असे 8 उमेदवारांचा बिनविरोध विजय झाला आहे. बारामती हा पारंपरिक राजकीय प्रभावाचा गड मानला जातो. त्यामुळे पहिल्या टप्प्यातील हा विजय आगामी 33 जागांवरील लढतीची दिशा ठरवणारा ठरेल, अशी राजकीय वर्तुळातील चर्चा आहे.

• बिनविरोध विजय झालेले उमेदवार

किशोर मासाळ, अभिजित जाधव, अनुप्रिता डांगे, धनश्री बांदल, श्वेता नाळे, शर्मिला ढवाण, अश्विनी सातव आणि आफ्रिन बागवान. यापैकी अनुप्रिता डांगे यांचा विजय छाननीतच निश्चित झाला होता.

• नगराध्यक्ष पदासाठी 5 उमेदवार रिंगणात

बारामतीत नगराध्यक्ष पदासाठी 5 उमेदवार अंतिम झाले आहेत. यात दोन्ही राष्ट्रवादी गटांमध्ये थेट सामना रंगणार आहे.

1. राष्ट्रवादी काँग्रेस (अजित पवार) : सचिन सदाशिव सातव

2. राष्ट्रवादी काँग्रेस (शरद पवार) : बळवंत बेलदार

3. भाजप : गोविंद देवकाते

4. बसप : काळूराम चौधरी

5. अपक्ष : शुभम मोरे

या पाचही उमेदवारांमध्ये जोरदार स्पर्धा पाहायला मिळत आहे. भाजप शहरी मतदारांना आकर्षित करण्याच्या प्रयत्नात असून, बसप व अपक्ष उमेदवार स्थानिक प्रश्नांवर भर देत मतदारांपर्यंत पोहोचत आहेत. मात्र खरी लढत ही अजित पवार व शरद पवार यांच्या राष्ट्रवादी गटांतच रंगणार, असा अंदाज व्यक्त केला जात आहे. आता उर्वरित 33 जागांवरील प्रचाराला वेग येणार असून, बारामतीची निवडणूक कोणत्या दिशेने जाते हे पाहणे उत्सुकाचे ठरणार आहे.