कार्यक्रमात मोठ्या संख्येने अनुयायांनी सहभाग घ्यावा असे सांगण्यात आले आहे. धम्मभोजनाचे आयोजन, भीम जयंती रथ-रॅलींचे स्वागत आणि सत्कार करण्यात येणार..
पोलीस वार्ता, यवतमाळ : 2025 यावर्षी वणीत भीम टायगर सेनेच्या वतीने डॉ.बाबासाहेब आंबेडकर यांची जयंती ऐतिहासिक आणि अभूतपूर्व सोहळ्याने साजरी करण्याचे आयोजन केले आहे.
हा केवळ एक कार्यक्रम नसून डॉ.बाबासाहेबांच्या विचारांची विजययात्रा असणार आहे. वणीतील रस्ते जयभीमच्या घोषणांनी दणदणार आणि इतिहास घडणार! असा दावा भीम टायगर सेनेच्या वतीने करण्यात आला आहे. आदल्या रात्री 13 एप्रिलच्या रात्री 12 वाजता केक कापून महामानवाला मानवंदना अर्पण केली जाईल. हा क्षण प्रत्येक भीमसैनिकांसाठी अभिमानास्पद आणि ऐतिहासिक असतो. 14 एप्रिल रोजी दुपारी 12 वाजेपासून कार्यक्रमांना सुरुवात होईल व त्याच वेळी धम्मभोजनाचे आयोजन करण्यात येईल, यासाठी कार्यक्रमात मोठ्या संख्येने अनुयायांनी सहभाग घ्यावा असे सांगण्यात आले आहे.
महामानव डॉ.बाबासाहेबांनी शिकवलेल्या समता आणि बंधुभावाच्या तत्वांनुसार कोणताही जातीभेद, प्रांतभेद न करता आम्ही सर्व समाज बांधव एकत्र येऊन या महान विभूतीचा जन्मोत्सव, जयंती उत्सव साजरा करणार आहोत.
