भुसावळ : तालुक्यातील सुनसगाव येथे घरफोडीची घटना उघडकीस आली असून अज्ञात चोरट्याने सुमारे ४१ हजार रुपयांच्या ऐवजावर डल्ला मारल्याची घटना समोर आली आहे. या प्रकरणी संशयिताविरुद्ध भुसावळ तालुका पोलीस ठाण्यात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी दिलीप मुरलीधर पाटील (वय ६९, रा. इंदिरा हौसिंग सोसायटी, नाशिक रोड, नाशिक; मूळ रा. सुनसगाव, ता. भुसावळ) यांनी तक्रार दिली आहे. दिनांक १ ऑक्टोबर २०२५ रोजी सकाळी १० ते ४ मे २०२६ रोजी सकाळी ९ या कालावधीत त्यांच्या मालकीच्या सुनसगाव येथील घर क्रमांक १६९ च्या वरच्या मजल्यावरील घरात ही चोरी झाल्याचे समोर आले आहे.
चोरट्याने घराच्या दरवाजाचा कोंडा सैल करून दरवाजा उघडत आत प्रवेश केला. त्यानंतर घरातील तांबे, पितळ व कासेची भांडी तसेच दोन लोखंडी खाटा असा एकूण ४१ हजार रुपयांचा ऐवज चोरून नेल्याचे फिर्यादीत नमूद करण्यात आले आहे. या प्रकरणात अजिंक्य राजेंद्र चौधरी (रा. सुनसगाव, ता. भुसावळ) याच्यावर संशय व्यक्त करण्यात आला आहे.
या प्रकरणी भुसावळ तालुका पोलीस ठाण्यात CCTNS क्र. ०९३/२०२६ नुसार भा.न्याय संहिता कलम ३३१(४), ३३१(३) व ३०५(१) अन्वये गुन्हा दाखल करण्यात आला असून पुढील तपास पोहेकॉ. धीरज मंडलीक करीत आहेत.
