रेल्वे स्थानकावर सुरक्षा यंत्रणांची रंगीत तालीम; दोन दहशतवाद्यांना ताब्यात घेण्याचे प्रात्यक्षिक..
पोलीस, वार्ता भुसावळ | येत्या 15 ऑगस्टच्या पार्श्वभूमीवर भुसावळ रेल्वे स्थानकाच्या सुरक्षेचा आढावा घेण्यासाठी लोहमार्ग पोलीस व आरपीएफसह विविध सुरक्षा आणि आपत्कालीन यंत्रणांच्या सहभागातून मॉकड्रिल घेण्यात आले. अचानक एखादी घटना घडल्यास विविध पथके किती तत्परतेने घटनास्थळी पोहोचून परिस्थिती नियंत्रणात आणू शकतात, तसेच बचावकार्य आणि पुढील कारवाई किती वेळेत पूर्ण करता याची प्रत्यक्ष रंगीत तालीम दि.12 ऑगस्ट रोजी घेण्यात आली.
या कवायतीत लोहमार्ग पोलीस अधिकारी व कर्मचारी, रेल्वे सुरक्षा दलाचे(आरपीएफ) अधिकारी व कर्मचारी, जळगाव येथील क्यूआरटी पथक, बीडीडीएस पथक, श्वान पथक, एटीएस पथक, अग्निशमन पथक तसेच आरोग्य विभागाच्या पथकाने सहभाग घेतला होता.
मॉकड्रिल दरम्यान रेल्वे स्थानकावर संशयास्पद परिस्थिती निर्माण झाल्याचे गृहीत धरून सुरक्षा यंत्रणांनी तातडीने हालचाली सुरू केल्या. विविध पथकांनी घटनास्थळी पोहोचून परिस्थितीचा अंदाज घेत कारवाई केली. यावेळी रेल्वे स्थानकावरून दोन दहशतवाद्यांना ताब्यात घेण्याचे प्रात्यक्षिक करण्यात आले. बीडीडीएस व श्वान पथकाने संशयास्पद वस्तूंची तपासणी, तर इतर पथकांनी परिसर सुरक्षित करण्याची कार्यवाही केली.
