खराब हवामानानंतर दिल्ली-NCR मध्ये GRAP लागू.. जाणून घ्या कोणत्या गोष्टींवर आहे बंदी?

• GRAP चा पहिला टप्पा कधी लागू होतो?

GRAP चा पहिला टप्पा लागू केला जातो जेव्हा AQI 201 ते 300 दरम्यान असतो. यामध्ये बांधकाम आणि पाडकामातून निघणारी धूळ आणि भंगार व्यवस्थापनाशी संबंधित सूचना लागू आहेत. उघड्यावर कचरा जाळणे व फेकण्यास मनाई आहे. नियमितपणे कचरा उचलण्याच्या सूचना दिल्या आहेत. रस्त्यावर धूळ उडू नये म्हणून काही दिवसांच्या अंतराने पाण्याची फवारणी केली जाते. डिझेल जनरेटर संच वापरण्यास बंदी आहे आणि PUC नियमांची काटेकोरपणे अंमलबजावणी केली जाते. वाहनांमधून निघणाऱ्या धूरावर कडक कारवाई केली जाते.

• GRAP चा दुसरा टप्पा कधीपासून लागू होतो?

GRAP चा दुसरा टप्पा लागू केला जातो जेव्हा AQI 301 ते 400 दरम्यान असतो. यामध्ये रुग्णालये, रेल्वे आणि मेट्रो सेवा वगळता इतर ठिकाणी डिझेल जनरेटरच्या वापरावर बंदी घालण्यात आली आहे. दररोज रस्ते स्वच्छ केले जातात आणि पाण्याची फवारणी केली जाते. कारखान्यांमध्ये फक्त योग्य इंधन वापरले जाते. लोकांना सार्वजनिक वाहतुकीचा जास्तीत जास्त वापर करण्यास प्रोत्साहित करण्यासाठी, पार्किंग शुल्क वाढवले ​​जाते आणि बांधकाम साइट्सची तपासणी वाढविली जाते.

• GRAP चा तिसरा टप्पा कधी लागू होतो?

तिसरा टप्पा लागू केला जातो जेव्हा AQI 401 ते 450 दरम्यान असतो. यामध्ये दररोज रस्ते स्वच्छ केले जातात आणि नियमितपणे पाण्याची फवारणी केली जाते. बांधकाम आणि पाडकामात बोअरिंग आणि ड्रिलिंग करण्यास बंदी आहे. ओपन ट्रेंच सिस्टीमद्वारे पायलिंगचे काम, सीवर लाइन, ड्रेनेज आणि इलेक्ट्रिक केबलचे काम बंद आहे. वीटभट्ट्यांच्या कामावर बंदी आहे. बंदी दरम्यान कच्च्या रस्त्यावर वाहने चालवता येणार नाहीत. डेब्रिजच्या वाहतुकीवर बंदी आहे. सर्व स्टोन क्रशर झोन बंद झाले आहेत. खाणकाम, BS-3 पेट्रोल आणि BS-4 डिझेल वाहनांवर बंदी आहे. हलक्या मालाची वाहने चालणार नाहीत.

• GRAP चा चौथा टप्पा कधी लागू होतो?

जेव्हा AQI 450 पेक्षा जास्त असतो, तेव्हा GRAP चा चौथा टप्पा लागू केला जातो. या टप्प्यात ट्रक, लोडर या अवजड वाहनांना दिल्लीत प्रवेश करण्यास बंदी घालण्यात आली आहे. केवळ अत्यावश्यक वस्तू वाहून नेणाऱ्या वाहनांनाच प्रवेश दिला जातो. सर्व प्रकारची बांधकामे व पाडकामांवर बंदी घालण्यात आली आहे. शालेय विद्यार्थ्यांसाठी ऑनलाइन वर्ग आणि सरकारी आणि खाजगी कार्यालयांसाठी घरून काम करण्याचा निर्णय राज्य सरकार घेऊ शकते. चौथ्या टप्प्यातही सम-विषमचा निर्णय घेतला जाऊ शकतो, तो बंधनकारक नसला तरी राज्य सरकारला तसे अधिकार देण्यात आले आहेत.

GRAP-3 दरम्यान लागू करण्यात आलेल्या निर्बंधांनुसार हलक्या मालाच्या वाहनांवर बंदी आहे, तर एखादे वाहन अत्यावश्यक वस्तूंची वाहतूक करत असल्यास त्याला सूट देण्यात आली आहे. याशिवाय आंतरराज्यीय बसेसमध्ये केवळ इलेक्ट्रिक, सीएनजी वाहने धावत आहेत. GRAP च्या तिसऱ्या टप्प्यांतर्गत, दिल्ली आणि गुरुग्राम, फरिदाबाद, गाझियाबाद आणि गौतम बुद्ध नगर जिल्ह्यांमध्ये BS-III पेट्रोल आणि BS-IV डिझेल वाहने चालविण्यास बंदी आहे. मुलांचे वर्ग ऑनलाइन घेता येतील, अशीही तरतूद आहे. दिल्ली सरकारने यावर निर्णय घेतला आहे, पण त्यांची इच्छा असेल तर यूपी आणि हरियाणा सरकारही यावर निर्णय घेऊ शकतात.