राजीनामा दिल्याने माजी मंत्री धनंजय मुंडे यांचे खाते रिक्त होते, आणि भुजबळ यांना मंत्रीपद न मिळाल्याने ते पक्षावर नाराज होते..
पोलीस वार्ता, नाशिक : मा.छगन भुजबळ यांची मंत्रीपदी वर्णी लागली आहे. त्यांना आज मुंबई येथे राजभवनात सकाळी 10 वाजता राज्यपाल सी.पी.राधाकृष्णन यांनी मंत्रीपदाची शपथ दिली आहे. याप्रसंगी मुख्यमंत्री देवेंद्र फडणवीस आणि उपमुख्यमंत्री एकनाथ शिंदे व उपमुख्यमंत्री अजित पवार हे देखील उपस्थित होते.
अलीकडेच राजीनामा दिलेले राष्ट्रवादी काँग्रेसचे अन्न व नागरी पुरवठा मंत्री धनंजय मुंडे यांचे खाते रिक्त होते. आणि भुजबळ यांना मंत्रीपद न मिळाल्याने ते पक्षावर नाराज होते. त्यामुळे मुंडे यांच्या जागी भुजबळ यांची वर्णी लागली आहे. असेच म्हणावे लागेल, उशिरा का होईना भुजबळांची नाराजी दूर करण्यात आली आहे.
भुजबळांनी मंत्री पदाची शपथ घेतली असली तरी त्यांना कोणत्या खात्याची जबाबदारी देण्यात आली आहे हे स्पष्ट झालेले नाही. मात्र भुजबळांनी प्रतिक्रिया दिली आहे की, मुख्यमंत्री जे खातं देतील ते आपण स्वीकारू.
सरकार आल्यापासूनच महायुतीत छगन भुजबळ यांना मंत्रिपद असेल हे नक्की असताना देखील भुजबळांना त्यासाठी आजपर्यंत वाट पाहावी लागली. नाशिक जिल्ह्यात आधीच तीन राज्यमंत्री पद असून आता भुजबळ हे चौथे मंत्रीपदी नियुक्त झाले आहे.
