जे नागरिक, विद्यार्थी, शिक्षक, पालक किंवा व्यावसायिक 100 किंवा या पेक्षा अधिक पुस्तकांचे संच उपक्रमासाठी उपलब्ध करून देतील, अशा सर्वांचा विशेष सत्कार करण्यात येईल..
पोलीस वार्ता, नाशिक : नाशिकमधील ‘जीवन केशरी मराठी विद्यार्थी समूह’ या संघटनेने यंदाच्या शैक्षणिक वर्ष 2025-26 साठी एक अनोखा उपक्रम हाती घेतला आहे. समूहाच्या माध्यमातून गरीब, गरजू आणि होतकरू इयत्ता नववी व दहावीच्या विद्यार्थ्यांना मोफत पाठ्यपुस्तके वितरण करण्याचा हा उपक्रम असून यास जिल्ह्यातील विद्यार्थ्यांकडून उदंड प्रतिसाद मिळाला आहे. आतापर्यंत सुमारे 500 विद्यार्थ्यांनी या उपक्रमासाठी नोंदणी केली आहे.
या उपक्रमाची विशेष उल्लेखनीय बाब म्हणजे, हा समूह नाशिक मधील इयत्ता दहावीच्या विद्यार्थ्यांनी स्वतः सुरू केला असून कार्यक्रमाचे संपूर्ण नियोजन व आयोजन हे विद्यार्थीच करत आहेत. दहावीच्या परीक्षा समाप्तीनंतर आयोजनाच्या हालचालींना वेग आला आहे.
समूहाचे प्रमुख प्रसाद भालेकर आणि अदित्य रिकामे यांच्या नेतृत्वाखाली हा उपक्रम राबवला जात आहे. उपक्रमात अमित पगार, ओम क्षिरसागर, ओमकार कुटे, अथर्व तुपे, सार्थक पवार, लायगुडे, मंथन शेरताटे आणि आर्यन इंगळे हे विद्यार्थी सक्रियपणे सहभागी आहेत.
अनेक विद्यार्थी हे खेड्यातील वस्तीत वास्तव्यास असून, त्यांच्या शिक्षकांनी पाठ्यपुस्तकांसंदर्भात विचारणा करून विद्यार्थ्यांची नावनोंदणी करून घेतली आहे. यामुळे शिक्षकांच्या विद्यार्थ्यांविषयी असलेली आपुलकी व गुरूची शिष्यांबद्दल असलेली भावना दिसून आली.
जीवन केशरी मराठी विद्यार्थी समूह नाशिक तर्फे पाठ्यपुस्तके दान करणे संदर्भात सर्व नागरिकांना आवाहन करण्यात आले आहे. जे नागरिक, विद्यार्थी, शिक्षक, पालक किंवा व्यावसायिक 100 किंवा या पेक्षा अधिक पुस्तकांचे संच उपक्रमासाठी उपलब्ध करून देतील, अशा सर्वांचा विशेष सत्कार करण्यात येईल. त्याचबरोबर त्यांच्या हस्ते पाठ्यपुस्तकांचे वितरण करण्यात येईल. व्यावसायिकांच्या उत्पादनाचे किंवा प्रकल्पाचे प्रमोशन “प्रायोजक” (स्पॉन्सर) म्हणून करण्यात येईल. सामान्य नागरिक असतील तरीही त्यांना “प्रायोजक” म्हणून घोषित करण्यात येईल.
इयत्ता नववी व दहावीचे विद्यार्थीही ह्या उपक्रमात सहभागी होऊन पाठ्यपुस्तके दान करू शकतात. पाठ्यपुस्तके दान करणाऱ्या विद्यार्थ्यांच्या हस्ते पाठ्यपुस्तकांचे वितरण करण्यात येणार असल्याचे समूहाने स्पष्ट केले आहे.
