भुसावळ – (निलेश.के.फिरके) शहरातील श्रीराम नगर परिसरात सार्वजनिक ठिकाणी गावठी पिस्टल व जिवंत काडतुसासह एका संशयित तरुणाला पोलिसांनी ताब्यात घेतले. ही कारवाई ता. २ रोजी रात्री पावणे बारा वाजेच्या सुमारास करण्यात आली.
याबाबत मिळालेल्या माहितीनुसार, संदिप सुनील जाधव (वय २३, रा. कुमावत नगर, सहजयश अपार्टमेंट, प्लॉट क्रमांक ३०३, मखमलाबाद रोड, पंचवटी, नाशिक) हा श्रीराम मंदिराजवळील रस्त्यावर सार्वजनिक ठिकाणी संशयास्पदरीत्या फिरताना आढळून आला. यावेळी त्याच्याकडून एक गावठी पिस्टल व एक जिवंत काडतुस असा सुमारे २१ हजार रुपयांचा मुद्देमाल जप्त करण्यात आला.
सदर प्रकरणात आरोपीने मा. जिल्हाधिकारी यांच्या आदेशांचे उल्लंघन केल्याचेही समोर आले आहे. याप्रकरणी भूषण संजय चौधरी यांनी दिलेल्या फिर्यादीवरून बाजारपेठ पोलीस स्टेशन येथे गुन्हा दाखल करण्यात आला आहे. बाजारपेठ पोलिसांकडून पुढील तपास सुरू आहे.
