नाशिक जिल्ह्यातील नागरिकांसाठी मोफत विधी सेवा व कायदेविषयक मार्गदर्शन उपक्रम!

उपक्रम संपूर्ण एप्रिल महिनाभर राबविण्यात येणार आहे. ही मोबाईल व्हॅन जिल्ह्यातील सर्व न्यायालयीन क्षेत्रांमध्ये नियोजनबद्ध पद्धतीने फिरणार..

पोलीस वार्ता, नाशिक : महाराष्ट्र राज्य विधी(Law) सेवा प्राधिकरण, मुंबई तसेच मा. उच्च न्यायालय विधी सेवा समिती, मुंबई यांच्या मार्गदर्शनाखाली जिल्हा विधी सेवा प्राधिकरण, नाशिक व तालुका विधी सेवा समित्यांच्या वतीने एप्रिल 2026 दरम्यान “फिरते विधी सेवा शिबिर व फिरते लोक अदालत” या उपक्रमांतर्गत मोबाईल व्हॅनद्वारे सेवा देण्याचा उपक्रमाचा शुभारंभ नुकताच झाला. हा उपक्रम संपूर्ण एप्रिल महिनाभर राबविण्यात येणार आहे. ही मोबाईल व्हॅन जिल्ह्यातील सर्व न्यायालयीन क्षेत्रांमध्ये नियोजनबद्ध पद्धतीने फिरणार असून या योजनेचा लाभ अधिकाधिक नागरिकांनी घ्यावा, असे आवाहन दिवाणी न्यायाधीश वरिष्ठ स्तर तथा नाशिक जिल्हा विधी सेवा प्राधिकरण सचिव सुहास भोसले यांनी केले आहे.

या उपक्रमाचे उद्घाटन नुकतेच दि.2 एप्रिल रोजी जिल्हा व सत्र न्यायालय, नाशिक येथे झाले. उद्घाटन प्रमुख जिल्हा व सत्र न्यायाधीश तथा अध्यक्ष, नाशिक जिल्हा विधी सेवा प्राधिकरण राहुल रोकडे, यांच्या हस्ते झाले. यावेळी नाशिक मुख्यालयातील सर्व न्यायाधीश, जिल्हा सैनिक कल्याण कार्यालयाचे अधिकारी व कर्मचारी, विधी स्वयंसेवक तसेच न्यायालयीन कर्मचारी उपस्थित होते.

ह्या मोबाईल व्हॅनच्या माध्यमातून नाशिक जिल्ह्यातील विविध तालुके व दुर्गम भागांमध्ये जाऊन नागरिकांना मोफत विधी सेवा, कायदेविषयक मार्गदर्शन, शासकीय योजनांची माहिती तसेच तडजोडींच्या प्रकरणांचे निपटारे फिरते लोक अदालतीमार्फत करण्यात येणार आहेत. या उपक्रमामुळे सर्वसामान्य नागरिकांना न्यायप्रवेश सुलभ होणार असून न्यायव्यवस्था अधिक प्रभावीपणे लोकांपर्यंत पोहोचण्यास मदत होणार आहे. “फिरते विधी सेवा शिबिर व लोकअदालत” या उपक्रमामुळे ग्रामीण व वंचित घटकांपर्यंत न्यायव्यवस्थेची सेवा पोहोचविण्यास मोठी मदत होणार असल्याचे जिल्हा विधी सेवा प्राधिकरणाचे सचिव भोसले यांनी म्हटले आहे.