भुसावळ : जळगाव जिल्हा पोलीस दलाने हरविलेले व चोरीस गेलेले मोबाईल शोधून ते मूळ मालकांना परत देत नागरिकांचा विश्वास संपादन करणारी उल्लेखनीय कामगिरी केली आहे.भुसावळ येथील उपविभागीय पोलीस अधिकारी कार्यालयात बुधवारी आयोजित विशेष कार्यक्रमात तब्बल १५ लाख १९ हजार ४९८ रुपये किंमतीचे १०९ मोबाईल मूळ मालकांना सुपूर्द करण्यात आले. याचवेळी पोलीस अधिकारी-अंमलदार व पत्रकारांना हेल्मेटचेही वाटप करण्यात आले.
कार्यक्रमात जळगावचे पोलीस अधीक्षक श्रीकांत धिवरे व अपर पोलीस अधीक्षक संदीप गावीत यांच्या हस्ते मोबाईल परत करण्यात आले. भुसावळ उपविभागातील शहर, बाजारपेठ, तालुका व नशिराबाद पोलीस ठाण्यांच्या हद्दीतील ६८ मोबाईल शोधण्यात पोलिसांना यश आले असून त्यांची किंमत सुमारे ९ लाख ४४ हजार ४९८ रुपये आहे. तर मुक्ताईनगर उपविभागातील मुक्ताईनगर, बोदवड, वरणगाव व सावदा पोलीस ठाण्यांच्या हद्दीतील ४१ मोबाईल, अंदाजे ५ लाख ७५ हजार रुपये किंमतीचे मोबाईल नागरिकांना परत करण्यात आले.
कार्यक्रमात नागरिकांच्या मालमत्तेच्या सुरक्षेबरोबरच पोलीस कर्मचाऱ्यांच्या वैयक्तिक सुरक्षिततेलाही प्राधान्य देण्यात आले. भुसावळ उपविभागातील ४५ पोलीस अंमलदार तसेच पाच पत्रकारांना विविध दुचाकी शोरूमच्या सहकार्याने हेल्मेटचे वाटप करण्यात आले. यामध्ये बजाजचे योगेश चंदन, पंकज टीव्हीएसचे दंपेश फेगडे, होंडाचे दिपक पांडे, सुझुकीचे सुहास बि-हाडे व रॉयल एनफिल्डचे शुभम परदेशी यांचे विशेष सहकार्य लाभले.
यावेळी उपविभागीय पोलीस अधिकारी कार्यालयातील नव्याने सुसज्ज करण्यात आलेल्या दालनाचे उद्घाटनही पोलीस अधीक्षकांच्या हस्ते करण्यात आले.
कार्यक्रमास प्रशिक्षणार्थी उपअधीक्षक प्रशांत दरेकर, पोलीस निरीक्षक उद्धव डमाळे, राहुल वाघ, महेश गायकवाड यांच्यासह भुसावळ उपविभागातील अधिकारी, सुमारे ५० पोलीस अंमलदार, पत्रकार व नागरिक मोठ्या संख्येने उपस्थित होते.
