भुसावळ : शहरातील लकीबा नगर परिसरात गुरुवारी (ता. ११) एका अनोळखी तरुणाचा झाडाला गळफास घेतलेल्या अवस्थेतील मृतदेह आढळून आल्याने परिसरात खळबळ उडाली आहे. या घटनेबाबत घातपाताची शक्यता व्यक्त होत असून बाजारपेठ पोलिसांनी तपास सुरू केला आहे.
सूत्रांकडून मिळालेल्या माहितीनुसार, संबंधित तरुणाचा मृतदेह हिरव्या रंगाच्या ओढणीच्या सहाय्याने झाडाला लटकलेल्या अवस्थेत आढळून आला. विशेष म्हणजे, ज्या ठिकाणी मृतदेह आढळला त्या झाडापर्यंत पोहोचण्यासाठी जवळच असलेल्या गेल्या २० ते २५ वर्षांपासून बंद पडलेल्या घराच्या छतावरून जावे लागते. त्यामुळे मृतदेह झाडाला लटकविण्यात आला असावा, अशी शक्यता नाकारता येत नसल्याने प्रकरण अधिक गूढ बनले आहे.
सदर घराचे मालक श्रीकांत पाठक असून ते सध्या पुणे येथे वास्तव्यास असल्याची माहिती समोर आली आहे. घटनेची माहिती मिळताच बाजारपेठ पोलीस स्टेशनचे अधिकारी व कर्मचारी घटनास्थळी दाखल झाले. त्यांनी मृतदेह खाली उतरवून पंचनामा केला व शवविच्छेदनासाठी ग्रामीण रुग्णालयात पाठविला.
मृत तरुणाची ओळख अद्याप पटलेली नसून त्याचे वय अंदाजे २५ ते ३० वर्षांच्या दरम्यान असल्याचे सांगितले जात आहे. आत्महत्या की घातपात, याबाबत विविध शक्यता तपासल्या जात असून शवविच्छेदन अहवालानंतर मृत्यूमागील कारण स्पष्ट होण्याची अपेक्षा आहे.
या संशयास्पद घटनेमुळे लकीबा नगर परिसरात एकच खळबळ उडाली असून नागरिकांमध्ये भीती व चर्चेचे वातावरण निर्माण झाले आहे. पोलिसांकडून सर्व बाजूंनी तपास सुरू असून मृत तरुणाची ओळख पटविण्याचे प्रयत्नही वेगाने सुरू आहेत.
