भुसावळ : शहरातील पंचशील नगर परिसरात अज्ञात चोरट्यांनी बंद घराचे कुलूप तोडून घरफोडी करत सुमारे १ लाख ४६ हजार २०० रुपयांचे सोन्या-चांदीचे दागिने चोरून नेल्याची घटना उघडकीस आली आहे. याप्रकरणी शुभम विनायक जामनकार यांनी भुसावळ शहर पोलीस ठाण्यात अज्ञात चोरट्याविरुद्ध फिर्याद दिली आहे.
पोलीस सूत्रांकडून मिळालेल्या माहितीनुसार, १८ मे २०२६ रोजी सायंकाळी ७ वाजेपासून ते ७ जून २०२६ रोजी सायंकाळी ७.३० वाजेदरम्यान ही चोरी झाली. अज्ञात चोरट्याने घराच्या मुख्य दरवाजाचे कुलूप तोडून अनधिकृतपणे घरात प्रवेश केला. त्यानंतर लोखंडी कपाटातील लॉकरमध्ये ठेवलेले सोन्या-चांदीचे दागिने चोरून नेले.
दरम्यान, याच परिसरातील कुसुम हिरासिंग चंदेले (वय ७०, रा. पंचशील नगर, भुसावळ) यांच्या घरातही चोरी झाल्याची माहिती समोर आली आहे. त्यामुळे पंचशील नगर परिसरात चोरट्यांची दहशत निर्माण झाली असून नागरिकांमध्ये भीतीचे वातावरण आहे.
या प्रकरणाचा पुढील तपास भुसावळ शहर पोलीस करीत आहेत. परिसरातील सीसीटीव्ही फुटेज आणि इतर तांत्रिक पुराव्यांच्या आधारे चोरट्यांचा शोध घेण्याचे काम सुरू आहे.
