शिवीगाळीच्या वादातून मित्राचा गळा आवळून खून; संशयिताला एक दिवसांची पोलिस कोठडी
भुसावळ : शहरातील जुन्या नगरपरिषदेच्या आवारातील विहिरीसमोरील खोलीत मित्रांमध्ये झालेल्या शिवीगाळीच्या वादातून तरुणाचा गळा आवळून खून केल्याच्या प्रकरणात अटक करण्यात आलेल्या संशयित आरोपी पवन अनिल सोनवणे याला न्यायालयात हजर करण्यात आले. न्यायालयाने त्याला एक दिवसांची पोलिस कोठडी सुनावली आहे.
विसर्जनाच्या दिवशी जुन्या नगरपरिषदेच्या आवारातील विहिरीसमोरील खोलीत मित्रांमध्ये वाद झाला. या वादाचे पर्यवसान मारहाणीत होऊन एका तरुणाचा गळा आवळल्याने त्याचा मृत्यू झाल्याची घटना घडली. घटनेनंतर संशयित आरोपीने स्वतःहून पोलिसांसमोर हजर होत घटनेची माहिती दिल्यानंतर त्याला अटक करण्यात आली.
या प्रकरणी भुसावळ बाजारपेठ पोलिस ठाण्यात खुनाचा गुन्हा दाखल करण्यात आला आहे. दरम्यान, या प्रकरणात एका १७ वर्षीय अल्पवयीन मुलालाही ताब्यात घेण्यात आले असून, त्याला जळगाव येथील बाल निरीक्षण गृहात रवाना करण्यात आले आहे.
संशयित आरोपीला न्यायालयाने एक दिवसांची पोलिस कोठडी दिल्याने पोलिसांकडून घटनेमागील नेमके कारण, वादाची पार्श्वभूमी तसेच घटनेतील इतर बाबींचा तपास केला जात आहे. पोलीस निरीक्षक राहुल वाघ यांच्या मार्गदर्शनाखाली पुढील तपास सुरू आहे.
