रायगड जिल्ह्यात तापी नदीकाठी 5287 गणेशमूर्तींचे निर्माल्य संकलन!

धर्माधिकारी प्रतिष्ठानच्या 448 श्री सदस्यांचा उपक्रम; 18 टन निर्माल्य खतनिर्मितीसाठी पाठविले..

पोलीस वार्ता, भुसावळ | अनंत चतुर्दशीच्या निमित्ताने डॉ. नानासाहेब धर्माधिकारी प्रतिष्ठान, रेवदंडा, ता.अलिबाग, जि.रायगड यांच्या वतीने शुक्रवारी दि.25 सप्टेंबर रोजी तापी नदीकाठी निर्माल्य संकलनाचा उपक्रम राबविण्यात आला. पद्मश्री महाराष्ट्र भूषण डॉ. श्री.आप्पासाहेब धर्माधिकारी आणि आदरणीय तीर्थरूप डॉ. श्री.सचिनदादा धर्माधिकारी यांच्या मार्गदर्शनाखाली हा उपक्रम घेण्यात आला.

भुसावळ शहरातील तापी नदीवरील पुलाच्या चारही बाजूंना भुसावळ व यावल तालुक्यातील एकूण 448 श्री सदस्यांनी निर्माल्य संकलनाचे काम केले. या उपक्रमादरम्यान घरगुती तसेच विविध गणेश मंडळांच्या 5 हजार 287 गणेशमूर्तींचे निर्माल्य संकलित करण्यात आले. संकलित निर्माल्याची वाहतूक करण्यासाठी एकूण सात ट्रॅक्टर वापरण्यात आले.

संकलनानंतर सदस्यांनी निर्माल्याचे तत्काळ विलगीकरण करून त्यातील सुमारे 18 टन निर्माल्य वृक्षांसाठी खतनिर्मिती करण्याच्या उद्देशाने श्री समर्थ बैठक, अट्रावल येथे पाठविण्यात आले. उर्वरित निर्माल्याची स्थानिक प्रशासनाच्या नियमानुसार विल्हेवाट लावण्यात आली आहे.

नागरिकांचा उत्स्फूर्त प्रतिसाद

निर्माल्य संकलन उपक्रमाला तापी नदी परिसरातील नागरिकांनीही उत्स्फूर्त प्रतिसाद दिला. अनेक नागरिकांनी आपल्या घरातील तसेच गणेशोत्सवातील निर्माल्य विश्वासाने सदस्यांकडे सुपूर्द केले. विशेष म्हणजे, अनेक नागरिकांनी यापुढे निर्माल्य प्लास्टिकच्या पिशव्यांमध्ये संकलित न करता पर्यावरणपूरक पद्धतीने देण्याचा स्वैच्छिक संकल्प केला. पर्यावरण संवर्धन, नदी स्वच्छता आणि निर्माल्याची योग्य विल्हेवाट या उद्देशाने राबविण्यात आलेल्या या उपक्रमाचे उपस्थित प्रशासनातील अधिकाऱ्यांनी कौतुक केले. धार्मिक उत्सवांसोबतच पर्यावरण संवर्धनाचा संदेश देणारा हा उपक्रम ठरला.