विरोदा ग्रामपंचायतीतर्फे दिव्यांग बांधवांना टेबल फॅनचे वितरण

विरोदा( प्रतिनिधी ) विरोदा ता. यावल येथे सन २०२६-२७ या आर्थिक वर्षातील ५ टक्के दिव्यांग निधीअंतर्गत दिव्यांग बांधवांसाठी विविध कल्याणकारी उपक्रम राबविण्यात येत असून, त्याचाच एक भाग म्हणून दिव्यांगांच्या मागणीनुसार १५ लाभार्थ्यांना मोठ्या टेबल फॅनचे वितरण करण्यात आले. वितरण कार्यक्रम प्रशासक सरपंच जीवन कडू तायडे, उपसरपंच विनोद सुकदेव झाल्टे, ग्रामपंचायत सदस्या पूनम चौधरी, तिलोत्तमा वारके, मीनाबाई बराटे, ग्रामपंचायत अधिकारी शिवाजी सोनवणे, शिपाई अमोल वारके तसेच माजी शिपाई ज्ञानदेव वारके आणि ग्रामस्थ यांच्या हस्ते पार पडला. उन्हाळ्याच्या तीव्र पार्श्वभूमीवर मिळालेल्या या मदतीमुळे दिव्यांग बांधवांनी समाधान व्यक्त करत ग्रामपंचायत प्रशासनाचे आभार मानले. ग्रामपंचायतीच्या वतीने दिव्यांगांसाठी पुढील काळातही विविध आवश्यक सुविधा उपलब्ध करून देण्याचा मानस व्यक्त करण्यात आला.