मंगला एक्स्प्रेसमधील २५ विद्यार्थिनींना अन्नातून त्रास

पॅन्ट्री कारमधील अन्न खाल्ल्यानंतर पोटदुखी, जुलाब; भुसावळ मध्ये रेल्वेच्या वैद्यकीय पथकाकडून तपासणी..

पोलीस वार्ता, भुसावळ | रेल्वे गाडी नंबर 12618 अप- हजरत निजामुद्दीन-एर्नाकुलम, मंगला एक्स्प्रेसमधून प्रवास करणाऱ्या होली फॅमिली स्कूलच्या सुमारे 91 विद्यार्थ्यांपैकी 25 ते 30 विद्यार्थिनींना रेल्वे गाडीतील जेवण जेवल्यानंतर पोटदुखी व जुलाबाचा त्रास झाल्याची घटना शुक्रवारी दि.28 ऑगस्ट रोजी रात्री समोर आली आहे. त्यानंतर भुसावळ रेल्वे स्थानकावर रेल्वेच्या विविध विभागांच्या संयुक्त पथकाने विद्यार्थ्यांची तपासणी करून त्यांना औषधे व ओआरएस देण्यात आले. उपचारानंतर सर्व विद्यार्थ्यांची प्रकृती स्थिर असल्याचे रेल्वे प्रशासनाने सांगितले.

होली फॅमिली स्कूलचे विद्यार्थी हजरत निजामुद्दीन ते त्रिशूर असा प्रवास करीत होते. प्रवासादरम्यान एस/३ डब्यातील काही विद्यार्थिनींना पोटदुखी व जुलाबाचा त्रास सुरू झाला. मंगला एक्स्प्रेस भुसावळ स्थानकावर पोहोचल्यानंतर आरपीएफ, सीआयबी, जीआरपी, स्टेशन मॅनेजर, रेल्वे वैद्यकीय, आरोग्य व वाणिज्य विभागाच्या पथकाने एस/२ व एस/३ डब्यांची पाहणी केली.

वैद्यकीय पथकाने सुमारे ४० ते ४५ विद्यार्थ्यांची तपासणी करून आवश्यक औषधे व ओआरएस देण्यात आले. प्राथमिक चौकशीत सुमारे ४५ विद्यार्थ्यांनी पॅन्ट्री कारमधील अन्नपदार्थ खाल्ल्याचे समोर आले. त्यापैकी २५ ते ३० विद्यार्थ्यांना त्रास झाल्याचे आढळले.

पॅन्ट्री कारची तपासणी; साहित्य जप्त

घटनेनंतर आरपीएफ भुसावळ व वाणिज्य विभागाने पॅन्ट्री कारची संयुक्त तपासणी केली. यावेळी अमान्य पाण्याच्या बाटल्या तसेच काही खाद्यपदार्थ आढळून आले. पुढील तपास व आवश्यक कारवाईसाठी हे साहित्य वाणिज्य विभागाने जप्त केले.

विद्यार्थ्यांना पुढील उपचारासाठी भुसावळ स्थानकावर उतरविण्याचा प्रयत्न करण्यात आला. मात्र, होली फॅमिली स्कूलच्या मुख्याध्यापिका मिस मिनी जॉन यांनी विद्यार्थ्यांना ट्रेनमधून उतरविण्यास नकार देत प्रवास सुरू ठेवण्यास सहमती दर्शविली. त्यानंतर विद्यार्थ्यांसह गाडी पुढील प्रवासासाठी रवाना झाली.

मनमाडपर्यंत वैद्यकीय पथक सोबत

विद्यार्थ्यांची सतत वैद्यकीय देखरेख राहावी यासाठी डॉ. तालिबा (सीएमपी), डॉ. मोनिका (एडीएमओ), डॉ. रेशमी (एडीएमओ), चेतन फडणीस तसेच आयआरसीटीसीचे कर्मचारी केशव कुमार यांना भुसावळहून मनमाडपर्यंत विद्यार्थ्यांसोबत पाठविण्यात आले आहे.