(गुप्त माहितीच्या आधारे साकरी जवळ पोलीसांची कारवाई; ७९ हजारांचा मुद्देमाल जप्त)
भुसावळ – तालुक्यात अवैध दारू वाहतुकीवर पोलिसांनी मोठी कारवाई करत एका आरोपीस अटक केली आहे. ता.१८ मार्च रोजी उपविभागीय पोलीस अधिकारी केदार बारबोले यांच्या मार्गदर्शनाखाली ही कारवाई करण्यात आली.
गुप्त बातमीदारामार्फत मिळालेल्या माहितीनुसार योगेश बाबुराव माळी (वय ३५, रा. सिध्देश्वर नगर, वरणगाव) हा अॅक्टिव्हा(एम.एच.१९ डी.डी.६९१२) वरून भुसावळहून साकरीकडे अवैध दारू वाहतूक करत असल्याची माहिती पोलिसांना मिळाली होती. त्यानुसार पोलीस पथकाने साकरी गावाजवळ सापळा रचला.
सायंकाळी सुमारे ६ वाजण्याच्या सुमारास संशयित वाहन दिसताच पोलिसांनी ते थांबवून तपासणी केली. तपासणीत अॅक्टिव्हावर बॉक्समध्ये दारू साठवलेली आढळून आली.आरोपीकडे दारू वाहतुकीसाठी कोणताही वैध परवाना नसल्याचे निष्पन्न झाले.
या कारवाईत पोलिसांनी एकूण ७९ हजार १९० रुपये किमतीचा मुद्देमाल जप्त केला असून संकेत झांबरे यांनी दिलेल्या फिर्यादीवरून तालुका पोलीस स्टेशनला गुन्हा दाखल करण्यात आला असून आरोपी योगेश माळी याला अटक करण्यात आली आहे.
सदर कारवाईत पोलीस कर्मचारी रमन सुरळकर, योगेश पालवे, अविनाश टहाकळे व किरण तायडे यांनी सहभाग घेतला. पुढील तपास पोलीस करीत आहेत.
