स्थानिकांच्या सतर्कतेमुळे बालिकेची सुटका; संशयितास ताब्यात घेण्याची कारवाई सुरू
भुसावळ : तालुक्यातील जोगलखेडा येथे साडेचार वर्षीय बालिकेला आमिष दाखवून घरात नेऊन तिच्याशी गैरवर्तन केल्याची धक्कादायक घटना मंगळवारी (दि. १८) उघडकीस आली. या प्रकरणी धनराज दगडू जंजाळे (वय ६५, रा. जोगलखेडा, ता. भुसावळ) याच्याविरुद्ध भुसावळ तालुका पोलिस ठाण्यात अपहरण व विनयभंगासह संबंधित कलमांनुसार गुन्हा दाखल करण्यात आला आहे. संशयितास ताब्यात घेण्याची कारवाई सुरू असून, पोलिसांकडून पुढील तपास सुरू आहे.
पोलिसांत दाखल तक्रारीनुसार, बालिका सकाळी सुमारे अकरा वाजता घरासमोरील अंगणात खेळत होती. त्यावेळी धनराज जंजाळे हा तिच्याशी बोलताना दिसून आला. काही वेळाने बालिका दिसत नसल्याने तिच्या आईने परिसरात शोध सुरू केला.
दरम्यान, दुकानदार विशाल अण्णा पाटील यांनी बालिका आरोपीसोबत दुसऱ्या गावाच्या दिशेने जाताना पाहिल्याचे सांगितले. त्यानंतर विशाल अण्णा पाटील व गजानन सुभाष कोळी यांनी आरोपीच्या घरी जाऊन पाहणी केली. घराचा दरवाजा आतून बंद होता. वारंवार आवाज देऊनही दरवाजा न उघडल्याने संशय बळावला.
यानंतर आरोपीचा नातेवाईक विलास बाबुराव जंजाळे घटनास्थळी आला. त्याने दरवाजा उघडण्यास सांगितल्यानंतर घराचा दरवाजा उघडण्यात आला. घरातील अंधाऱ्या कोपऱ्यात बालिका आढळून आली. स्थानिकांच्या सतर्कतेमुळे बालिकेची सुखरूप सुटका करून तिला कुटुंबीयांच्या स्वाधीन करण्यात आले.
कुटुंबीयांनी बालिकेला विश्वासात घेऊन विचारपूस केली असता, आरोपीने तिला घरात नेऊन दरवाजा बंद केला आणि तिच्याशी गैरवर्तन केल्याचे समोर आले. त्यानंतर कुटुंबीयांनी भुसावळ तालुका पोलिस ठाण्यात तक्रार दाखल केली.
या प्रकरणी धनराज दगडू जंजाळे याच्याविरुद्ध गुन्हा दाखल करण्यात आला असून, परिक्षाविधी डीवायएसपी प्रशांत दरेकर यांच्या मार्गदर्शनाखाली पुढील तपास सुरू आहे. घटनेमुळे जोगलखेडा परिसरात खळबळ उडाली आहे.
