भुसावळ वरून बस प्रवासा दरम्यान महिलेचे साडेसहा लाखांचे दागिने गेले चोरीला

पिशवीत सोन्याच्या बांगड्या, मंगळसूत्र, नेकलेस, अंगठ्या व इतर दागिने असा एकूण 26 तोळे सोन्याचा ऐवज होता..

पोलीस वार्ता, भुसावळ : MSRTC बसने प्रवास करत असताना एका महिलेच्या पिशवीतून सुमारे 6 लाख 70 हजार रुपये किंमतीचे सोन्याचे दागिने अज्ञात चोरट्याने लंपास केल्याची घटना घडली आहे. याप्रकरणी भुसावळ बाजारपेठ पोलीस स्टेशनमध्ये दि.5 मे 2026 रोजी तक्रार दाखल करण्यात आली होती.

सविस्तर माहिती अशी की, फिर्यादी नंदा सुरेश गोराडकर (वय -59), रा. श्रीराम नगर, जामनेर रोड, भुसावळ या आपल्या नातेवाईकांकडे जाण्यासाठी दि. 2 मे 2026 रोजी सकाळी MSRTC बसमधून प्रवास करत होत्या. भुसावळ बसस्थानकावरून निघालेल्या बसमध्ये मोठी गर्दी असल्याने त्या बसमध्ये उभ्याच प्रवास करत होत्या. याचदरम्यान अज्ञात चोरट्याने त्यांना न कळता त्यांच्या पर्समधील दागिन्यांची पिशवी लंपास केली.

बसमधून उतरल्यावर नंदा गोराडकर यांनी पर्स तपासली असता दागिन्यांची पिशवी चोरीला गेल्याचे त्यांच्या लक्षात आले. त्यांनी तात्काळ नातेवाईकांना माहिती दिली व पोलिसांत धाव घेतली आणि अज्ञात चोरट्याविरुद्ध गुन्हा दाखल करण्यात आला. या पिशवीत सोन्याच्या बांगड्या, मंगळसूत्र, नेकलेस, अंगठ्या व इतर दागिने असा एकूण 26 तोळे सोन्याचा ऐवज होता. या सर्व दागिन्यांची किंमत सुमारे 6 लाख 70 हजार रुपये असल्याचे तक्रारीत फिर्यादी यांनी नमूद केले आहे. पोलिसांकडून बसस्थानक परिसरातील सीसीटीव्ही फुटेज तपासण्याचे काम सुरू आहे. बाजारपेठ पोलीस ठाण्याचे पोनि. राहूल वाघ यांच्या आदेशावरून गुन्ह्याचा पुढील तपास पोउपनिरी.मंगेश जाधव हे करीत आहे. दरम्यान, बसमध्ये वाढती गर्दी आणि अशा प्रकारच्या चोरीच्या घटनांमुळे प्रवाशांनी सतर्क राहण्याचे आवाहन पोलिसांनी केले आहे.