मुख्यमंत्री शेतकऱ्यांना सरसकट मदत करणार आहे, मंत्री छगन भुजबळ यांनी नुकसानीच्या पाहणी दौऱ्यादरम्यान सांगितले

येवला तालुक्यातील गवंडगाव, रस्ते सुरेगाव, पिंपळखुटे खुर्द, वाघाळे तसेच निफाड तालुक्यातील कोटमगाव व वनसगाव नुकसानींची पाहणी..

पोलीस वार्ता, नाशिक : जिल्ह्यात सतत सुरू असलेल्या अतिरिष्टीमुळे शेतशिवरात झालेल्या पिकांच्या नुकसानीचा पाहणी दौरा सद्या राज्यातील मंत्री आणि आमदार हे करत आहे. ज्यामुळे लवकर नुकसानग्रस्त शेतकऱ्यांना मदत मिळणार असल्याचे दिसत आहे. जिह्यात येवला व निफाड तालुक्यात देखील अतिवृष्टीचा फटका बसला असून कुठे शेत जमिनी पाण्याखाली गेल्या आहेत, या परिस्थितीचा आढावा घेण्यासाठी दि.25 सप्टेंबर 2025 रोजी येवल्याचे आमदार व राज्याचे अन्न, नागरी पुरवठा व ग्राहक संरक्षण मंत्री छगन भुजबळ यांनी शेतकऱ्यांच्या शेतशिवरात जाऊन पाहणी दौरा पूर्ण केला.

येवला तालुक्यातील गवंडगाव, रस्ते सुरेगाव, पिंपळखुटे खुर्द, वाघाळे तसेच निफाड तालुक्यातील कोटमगाव व वनसगाव आणि मांजरपाडा प्रकल्पाच्या माध्यमातून भरण्यात आलेला डोंगरगाव साठवण तलावाची पाहणी करण्यात आली. यावेळी मंत्री छगन भुजबळ यांच्यासोबत उपविभागीय अधिकारी बाबासाहेब गाढवे, निफाड तहसीलदार आबा महाजन, निफाड तहसीलदार विशाल नाईकवाडी, गट विकास अधिकारी संदीप वायाळ, गट विकास अधिकारी नम्रता जगताप, येवला ता.कृषी अधिकारी शुभम बेरड, निफाड ता.कृषी अधिकारी सुधाकर पवार, मंडळ अधिकारी रूपाली साळवे, ग्राम महसूल अधिकारी भारत नागरे, यांच्यासह इतर अधिकारी, शेतकरी उपस्थित होते.

मंत्री भुजबळ अधिकाऱ्यांना सूचना देताना म्हणाले की, अतिवृष्टीने शेतकऱ्यांच्या मका, सोयाबीन, कांदा, द्राक्षबागा, भुईमुग, टोमॅटो, भाजीपाला यासह विविध पिकांचे प्रचंड नुकसान झाले आहे. यामुळे शेतकरी हवालदिल झाला असून नुकसानीचे पंचनामे मोहीम स्तरावर करण्यात यावेत. तसेच एकही बाधित शेतकरी वंचित राहता कामा नये. ज्या ठिकाणी अतिवृष्टी झाली नाही तेथील अधिकाऱ्यांची मदत आवश्यक असल्यास घेण्यात यावी.

राज्याचे मुख्यमंत्री देवेंद्र फडणवीस यांनी सर्व निकष बाजूला ठेवून शेतकऱ्यांना सरसकट मदत करण्याची घोषणा केली आहे. राज्याच्या अन्न, नागरी पुरवठा विभागाच्या वतीने देखील अतिवृष्टी बाधित शेतकऱ्यांना आवश्यक ती मदत करण्यात येत आहे. बाधित शेतकऱ्यांना प्राथमिक स्वरूपाची मदत सुरू करण्यात आली असून प्रत्येकी 10 किलो तांदूळ आणि 10 किलो गहू अशा स्वरूपात अन्नधान्याचे वाटप सुरू करण्यात आले आहे.

आवश्यक त्या ठिकाणी आरोग्य विभागातर्फे वैद्यकीय सेवा देखील पुरविण्यात येत आहे. अतिवृष्टीमुळे रोगराई पसरण्याची शक्यता असल्याने आरोग्य यंत्रणांनी नागरिकांच्या आरोग्याच्या दृष्टीने दक्षता घ्यावी. शेतकरी हा जगाचा पोशिंदा आहे. ‘बळीराजाने धीर धरावा, खचून जाऊ नये’ अशा शब्दात मंत्री छगन भुजबळ यांनी बाधित शेतकऱ्यांना धीर व पाठबळ दिले.