उत्रोली-वडगाव MIDC संदर्भात विधान भवन येथे उपमुख्यमंत्री सुनेत्रा पवार यांच्या उपस्थितीत बैठक संपन्न!

शेतकऱ्यांशी विश्वासपूर्वक संवाद साधून समन्वयाने कार्यवाही करावी. त्यांच्या शंकांचे निरसन करून योग्य मोबदला मिळेल, याची पूर्ण काळजी घ्यावी..

पोलीस वार्ता, भोर | पुणे जिल्ह्यातील भोर तालुक्यात असलेल्या प्रस्तावित उत्रोली-वडगाव एमआयडीसी प्रकल्पासंदर्भात राज्याच्या उपमुख्यमंत्री सुनेत्रा अजित पवार यांनी विधान भवन येथे आढावा बैठक घेतली. स्थानिक लोकप्रतिनिधी, वरिष्ठ अधिकारी आणि संबंधित यंत्रणांच्या उपस्थितीत झालेल्या या बैठकीत सर्वांच्या समन्वयातून उत्रोली-वडगाव एमआयडीसी प्रकल्प तातडीने मार्गी लावण्याबाबत सविस्तर चर्चा या बैठकीत करण्यात आली.

याबाबत उपमुख्यमंत्री सुनेत्रा पवार यांनी एक्सवर (ट्विटर) पोस्ट करत माहिती दिली आहे. पुणे जिल्ह्यातील भोर तालुक्यात प्रस्तावित उत्रोली-वडगाव एमआयडीसी प्रकल्प तातडीने मार्गी लावण्यासाठी शेतकऱ्यांशी विश्वासपूर्वक संवाद साधून समन्वयाने कार्यवाही करावी.

त्यांच्या शंकांचे निरसन करून योग्य जनजागृती करावी तसेच शेतजमिनीला योग्य मोबदला मिळेल, याची पूर्ण काळजी घ्यावी, प्रकल्प राबविताना शेतकऱ्यांच्या हिताला सर्वोच्च प्राधान्य देण्याचे स्पष्ट निर्देश उपमुख्यमंत्री पवार यांनी दिले आहेत. या एमआयडीसी प्रकल्पामुळे भोर तालुक्याच्या प्रगतीला नवी दिशा मिळणार आहे.