1 एप्रिल 2019 पूर्वी नोंदणी झालेल्या सर्व वाहनांवर HSRP नंबर प्लेट अनिवार्य अन्यथा आरटीओ मधील अनेक सुविधा मिळणार नाहीत..
पोलीस वार्ता, मुंबई | राज्यात वाहनांना HSRP नंबर प्लेट बसविण्यासाठी 30 जून 2026 ही अंतिम मुदत असून, त्यानंतर 1 जुलैपासून नियमांचे पालन न करणाऱ्या वाहनधारकांवर मोटार वाहन कायद्यानुसार कडक कारवाई करण्यात येणार आहे. तसेच HSRP न बसविलेल्या वाहनांची आरटीओ कार्यालयातील अनेक प्रकारची महत्त्वाची कामेही रोखण्यात येणार आहेत. तसेच सर्व शासकीय आणि निमशासकीय कार्यालयांनीही त्यांच्या ताब्यातील वाहनांवर 30 जूनपूर्वी HSRP नंबर प्लेट बसवणे अनिवार्य आहे.
HSRP नंबर प्लेट न बसविणाऱ्या वाहनधारकांना वाहन हस्तांतरण, पत्ता बदल, कर्जबोजा चढविणे किंवा उतरविणे, वाहनाची पुनर्नोंदणी, वाहनातील बदल तसेच परवाना नूतनीकरण यांसारख्या आरटीओ मधील अनेक सुविधा मिळणार नाहीत. वाहनाच्या फिटनेस प्रमाणपत्राच्या नूतनीकरणासाठी ही अट लागू राहणार नाही.
राज्यात HSRP बसविण्याच्या कामासाठी तीन झोन निश्चित करण्यात आले असून, झोन 1 साठी रोझमेर्टा टेक्नॉलॉजीज लिमिटेड, झोन 2 साठी रिअल इंडस्ट्रीज लिमिटेड आणि झोन 3 साठी एफटीए HSRP सोल्यूशन्स प्रा. लि. या कंपन्यांची नियुक्ती करण्यात आली आहे. शासनाने HSRP बसविण्यासाठी अधिकृत दरही निश्चित केले आहेत. त्यानुसार दुचाकीसाठी 450 रुपये, तीनचाकीसाठी 500 रुपये, तर हलकी मोटार वाहने आणि मध्यम व अवजड व्यावसायिक वाहनांसाठी 745 रुपये (जीएसटी वगळून, फिटमेंट शुल्कासह) दर आकारण्यात येईल.
