उपअधीक्षक पुष्पलता दिघे यांचे पोलीस विभागातून, कुटुंब आणि जवळच्या सहकार्यांकडून कौतुक व अभिनंदन होत आहे..
पोलीस वार्ता, मुंबई : रायगड-रत्नागिरी विभाग महामार्ग वाहतूक सुरक्षा पोलीस विभागातील उपअधीक्षक पदावर कार्यरत असलेल्या श्रीमती पुष्पलता राजाराम दिघे यांना उत्कृष्ट सेवेबद्दल 26 जानेवारी 2026 रोजी भारत सरकारचे मानाचे राष्ट्रपती पोलीस पदक 2026 जाहीर झाले आहे. उपअधीक्षक दिघे या मूळच्या अहमदनगर जिल्ह्यातील संगमनेर तालुक्यातील तळेगाव, दिघे येथील रहिवाशी आहेत.
महामार्गावरील अपघातांचे प्रमाण कमी करण्यासाठी उपअधीक्षक पुष्पलता दिघे यांनी ‘शून्य अपघात’ ही मोहीम यशस्वीपणे राबवली आहे. राज्य गुप्तवार्ता विभागात कार्यरत असताना दहशतवाद आणि नक्षलवाद विरोधी मोहिमेत माहिती संकलनाचे महत्त्वपूर्ण काम त्यांनी पार पाडले आहे. तसेच गुन्हे शाखेमध्ये असताना अनेक क्लिष्ट गुन्ह्यांची उकल करण्यात त्यांचा मोठा सहभाग राहिला असून विशेषतः गुन्हे शाखेत कार्यरत असताना ‘ऑपरेशन मुस्कान’ अंतर्गत पीडित महिला व मुलींची सुटका करणे, तसेच ‘ऑपरेशन स्माईल’ च्या माध्यमातून अपहरण झालेल्या बालकांना शोधून त्यांना पुन्हा कुटुंबापर्यंत पोहोचवण्याच्या कामात त्यांनी विशेष योगदान दिले आहे. अनैतिक मानवी तस्करी आणि बालकामगार विरोधी मोहिमांमधील त्यांच्या कामगिरीची दखल देशपातळीवर घेतली गेली व त्यांच्या या कर्तबगारीबद्दल त्यांना यापूर्वी पोलीस महासंचालक आणि गृह विभागातर्फे राज्यस्तरीय पुरस्कारानेही गौरवण्यात आले आहेत. तसेच महाराष्ट्र राज्य मुख्यमंत्री आणि पोलीस महासंचालक(सी.आय.डी) यांच्या हस्ते सत्कार देखील करण्यात आला आहे.
श्रीमती पुष्पलता दिघे या 1996 च्या PSI बॅचमधील पहिल्या महिला परेड कमांडर आहेत. त्यांच्या बॅचदरम्यान उत्कृष्ट कायदेशीर ज्ञान, कौशल्य आणि समर्पित सेवेसाठी त्यांना 6 प्रतिष्ठित कायदा पुरस्कार हे मिळाले आहेत. त्यांच्या यशात त्याचे पती डॉ.राजाराम दिघे यांचा देखील मोठा वाटा आहे. ते महाराष्ट्र शासनाच्या ग्राम विकास मंत्रालयाआंतर्गत संचालक, ग्रामीण गृहनिर्माण विभागात मुंबईत वरीष्ठ अधिकारी पदावर कार्यरत आहेत. त्यांच्याकडे अतिरिक्त व्हिलेज सोसियल ट्रान्सफॉर्मेशन फाऊंडेशन, मुंबई येथील मुख्य कार्यकारी अधिकारी पदाचा देखील कार्यभार आहेत.
