महापौर श्रीमती आडके यांचा अर्ज भरून नाशिक शहरात मतदार यादी विशेष सखोल पुनरीक्षणास झाली सुरुवात

मतदार यादीच्या विशेष सखोल पुनरीक्षण (SIR) मोहिमेअंतर्गत घरोघरी जाऊन मतदारांची माहिती संकलित केली जाणार..

पोलीस वार्ता, नाशिक | भारत निवडणूक आयोगाच्या मतदार यादी विशेष सखोल परीक्षणास नाशिक महापौर श्रीमती हिमगौरी आडके आहेर यांच्यापासून आज दि. 30 जून रोजी सुरुवात झाली. जिल्ह्यात मतदार पुनरीक्षण मोहिमेंतर्गत आजपासून गृह भेटीस सुरुवात झाली. त्यानुसार नाशिक शहराच्या प्रथम नागरिक, महापौर श्रीमती आडके यांचा प्रगणना अर्ज भरुन घेण्यात आला. यावेळी सहायक मतदार नोंदणी अधिकारी अमोल निकम, मतदान केंद्रस्तरीय अधिकारी सारिका आहेर आदी उपस्थित होते.

यावेळी महापौर म्हणाल्या की, लोकशाही बळकट करण्यासाठी मतदार यादी अचूक, अद्ययावत आणि सर्वसमावेशक असणे आवश्यक आहे. मतदार यादीच्या विशेष सखोल पुनरीक्षण (SIR) मोहिमेअंतर्गत घरोघरी जाऊन मतदारांची माहिती संकलित केली जाणार असल्याने नागरिकांनी अधिकारी व केंद्रस्तरीय मतदार अधिकाऱ्यांना (BLO) आवश्यक माहिती व कागदपत्रे देऊन त्यांना पूर्ण सहकार्य करावे.

या मोहिमेअंतर्गत प्रत्येक पात्र मतदाराची माहिती अचूकपणे नोंदविण्यावर भर दिला जाणार आहे. यासाठी प्रशासनाचे अधिकारी व बीएलओ नागरिकांच्या घरी भेट देऊन Enumeration Form भरून घेतील. नागरिकांनी या प्रक्रियेला सकारात्मक प्रतिसाद द्यावा, असे आवाहन महापौर यांनी केले आहे.