भुसावळ : बाजारपेठ पोलीस ठाण्याच्या गोपनीय विभागात हवालदार पदावर कार्यरत असलेले भाऊसाहेब अशोक पाटील यांना त्यांच्या उल्लेखनीय पोलीस सेवेबद्दल उत्कृष्ट पोलीस पदकाने सन्मानित करण्यात आले. स्वातंत्र्यदिनानिमित्त आयोजित कार्यक्रमात जिल्ह्याचे पालकमंत्री तथा मंत्री गुलाबराव पाटील यांच्या हस्ते त्यांना हे पदक प्रदान करण्यात आले.
पोलीस महासंचालक, मुंबई यांच्या वतीने देण्यात येणाऱ्या या पदकामुळे भुसावळ पोलीस दलात आनंदाचे वातावरण आहे. हवालदार भाऊसाहेब पाटील यांच्या कार्याची दखल घेत त्यांना हा सन्मान मिळाल्याबद्दल सहकारी अधिकारी व कर्मचाऱ्यांकडून त्यांचे अभिनंदन करण्यात येत आहे.
