फैजपूर : भिवंडी येथील अमजदिया उर्दू प्राथमिक शाळेचे शिक्षक शेख वसीम हनीफ पिंजारी यांनी केंद्रीय शिक्षक पात्रता परीक्षा (सीटीईटी) सलग तिसऱ्यांदा उत्तीर्ण होत उल्लेखनीय यश संपादन केले आहे. 2023, 2024 आणि 2026 या तीन वर्षांत त्यांनी सातत्यपूर्ण कामगिरी करत आपली गुणवत्ता सिद्ध केली आहे.
सीटीईटी ही देशभर घेतली जाणारी आणि कठीण मानली जाणारी परीक्षा आहे. या परीक्षेत शेख पिंजारी यांनी केवळ उत्तीर्णता मिळवली नाही, तर सातत्याने यश मिळवत आदर्श निर्माण केला आहे. अलीकडील परीक्षेत त्यांनी पेपर 1 मध्ये 92 गुण आणि पेपर 2 मध्ये 97 गुण मिळवून उत्कृष्ट निकाल नोंदवला आहे.
शेख पिंजारी यांचे मूळ गाव आमोदा (ता. यावल, जि. जळगाव) असून त्यांच्या या यशामुळे गावात तसेच नातेवाईक व मित्रपरिवारात आनंदाचे वातावरण आहे.
अमजदिया उर्दू प्राथमिक शाळेतील मुख्याध्यापक अन्सारी निसार सर तसेच सर्व शिक्षकवृंद आणि सहकाऱ्यांनी त्यांच्या या यशाबद्दल अभिनंदन करत पुढील वाटचालीस शुभेच्छा दिल्या आहेत.
