भुसावळ शहरातून चोरीच्या तीन दुचाकी जप्त; एकाला अटक, एक जण फरार..

स्थानिक गुन्हे शाखा व बाजारपेठ पोलिसांच्या कारवाईत शहरातील मोहल्ला परिसरातून चोरीच्या तीन दुचाकी जप्त..

पोलीस वार्ता, भुसावळ : शहरातील इराणी मोहल्ला परिसरात लपवून ठेवलेल्या चोरीच्या तीन दुचाकी भुसावळ बाजारपेठ पोलीस ठाणे व जळगाव स्थानिक गुन्हे शाखेच्या संयुक्त पथकाने कारवाईत जप्त केल्या आहेत. या प्रकरणात एका संशयिताला अटक करण्यात आली असून दुसरा आरोपी फरार झाला आहे.

स्थानिक गुन्हेशाखेचे पोउपनि. रवि नरवाडे यांच्या मार्गदर्शनात पथक दि.6 एप्रिल 2026 रोजी सकाळी सुमारे 11 वाजता दरम्यान शहरातील इराणी मोहल्ला, रजा टॉवर या परिसरात पेट्रोलिंग करत होते. यावेळी एका घराच्या आडोशाला संशयास्पद अवस्थेत उभ्या असलेल्या तीन मोटारसायकली आढळून आल्या. संबंधित वाहनांच्या मालकांचा शोध घेतला असता कोणीही समोर आले नाही. यानंतर पोलिसांनी तीनही दुचाकी भुसावळ बाजारपेठ पोलीस ठाण्यात आणून त्यांच्या चेसिस व इंजिन क्रमांकाच्या आधारे तपास केला. तपासादरम्यान या तिन्ही मोटारसायकली अनुक्रमे मुक्ताईनगर, चोपडा शहर व तोफखाना (अहिल्यानगर) पोलीस ठाण्यात दाखल चोरीच्या गुन्ह्यांतील असल्याचे निष्पन्न झाले. या जप्त करण्यात आलेल्या दुचाकी 1)पल्सर (एमएच-19 ईएस-3555), 2)पल्सर एन-160 (एमएच-19 ईटी-3380) तसेच 3)केटीएम ड्यूक 250 (एमएच-16 डीटी-7433) आहे. तब्बल 2 लाख 10 हजार रुपये किंमतीचा मुद्देमाल जप्त केला.

या गुन्ह्यात हसनअली उर्फ आशु नियाजअली इराणी, रा- इराणी मोहल्ला, भुसावळ याला अटक करण्यात आली असून सलमान अली हुजूरअली इराणी हा आरोपी फरार झाला आहे. दोघांनी मिळून या दुचाकी चोरी करून त्या लपवून ठेवल्याची माहिती तपासात समोर आली आहे.

सदर कारवाई जिल्हा पोलीस अधीक्षक डॉ.महेश्वर रेड्डी, अपर पोअधी. अशोक नखाते, विभागीय पोलीस अधिकारी केदार बारबोले, गुन्हेशाखेचे वपोनि. राहुल गायकवाड तसेच बाजारपेठ पोलीस ठाण्याचे पोनि. राहुल वाघ यांच्या मार्गदर्शनात पोलीस पथक पीएसआय रवि नरवाडे, पोलीस कर्मचारी गोपाल गव्हाळे, उमाकांत पाटील, विकास सातदिवे, प्रशांत परदेशी, राहुल वानखेडे तसेच बाजारपेठ गुन्हे शाखेचे भूषण चौधरी, योगेश माळी, प्रशांत सोनार यांच्याकडून करण्यात आली.