भुसावळ ( दि 26) येथील बियाणी सैनिकी शाळेत दि२५रोजी पालक मेळावा आयोजित करण्यात आला होता.यानिमित्त विज्ञान व चित्र प्रदर्शनीचे भव्य आयोजन करण्यात आले होते.यात विद्यार्थ्यांनी तयार केलेले वैज्ञानिक तसेच भौगोलिक मॉडेल्स यांची माहितीपूर्ण मांडणी करण्यात आली होती.तसेच स्मरण चित्रे,रेखाचित्रे यांची देखील प्रदर्शनीत सुंदर मांडणी करण्यात आले होती.
संस्थेचे अध्यक्ष मनोज बियाणी,सचिव डॉ.संगीता बियाणी, राष्ट्रीय विज्ञान पुरस्काराने सन्मानित विज्ञान शिक्षक सुनील वानखेडे,संस्थेच्या कार्यकारी संचालिका स्मिता बियाणी व पालक भगवान देशमुख या प्रमुख पाहुण्यांच्या हस्ते फीत कापून प्रदर्शनीचे उद्घाटन करण्यात आले.या प्रदर्शनीत शाळेच्या विद्यार्थ्यांनी उत्स्फूर्तपणे सहभाग घेतला. यात मयंक सिंग इयत्ता १० वी च्या विद्यार्थ्यांने बनवलेली अंध व्यक्तींसाठी अडथळ्याचा संदेश देणारे सेंसर चष्मा,अतिवृष्टी याची सूचना देणारे सेंसर मॉडेल तसेच सौरमंडल व पृथ्वीची भौगोलिक रचना,निसर्ग चित्र,स्मरण चित्र तसेच ऐतिहासिक वास्तू चित्र इत्यादी या प्रदर्शनीचे विशेष आकर्षण होते. विद्यार्थ्यांनी स्वतः बनवलेल्या विविध वैज्ञानिक मॉडेल्सची उत्कृष्ट माहिती प्रमुख पाहुण्यांना व सर्व उपस्थित पालकांना दिली.प्रमुख पाहुणे व उपस्थित पालक यांनी विद्यार्थ्यांचे कौतुक केले.
याप्रसंगी बियाणी एज्युकेशन ग्रुपच्या विविध संस्थांचे प्राचार्य उपस्थित होते.या पालक मेळाव्यात शाळेतील विद्यार्थ्यांचे सर्व पालक मोठ्या संख्येने उपस्थित होते. या प्रदर्शनी करिता शाळेच्या शिक्षकांनी विद्यार्थ्यांना मार्गदर्शन केले तसेच प्रदर्शनी यशस्वी होण्याकरिता शाळेतील सर्व शिक्षक व शिक्षकेतर कर्मचारी यांनी परिश्रम घेतले.आभार प्रदर्शन प्राचार्य डी एम पाटील यांनी केले.
