१६.३४ लाखांचा मुद्देमाल हस्तगत; स्थानिक गुन्हे शाखेची धडाकेबाज कारवाई
भुसावळ : भुसावळ शहरातील घरफोडीचा गुन्हा अवघ्या १२ तासांत उघडकीस आणत जळगाव स्थानिक गुन्हे शाखेने परराज्यातील तिघा आरोपींना नागपुरातून जेरबंद केले. आरोपींकडून चोरीस गेलेले सोन्या-चांदीचे दागिने व रोख रक्कम असा एकूण १६ लाख ३४ हजार रुपयांचा मुद्देमाल हस्तगत करण्यात आला आहे.
याप्रकरणी फिर्यादी यांनी १ जून रोजी भुसावळ बाजारपेठ पोलीस ठाण्यात तक्रार दाखल केली होती. ३१ मे रोजी कामानिमित्त बाहेर गेल्यानंतर बंद घराचे कुलूप तोडून अज्ञात चोरट्यांनी सोन्या-चांदीचे दागिने व रोख रक्कम लंपास केल्याचे फिर्यादीत नमूद करण्यात आले होते. त्यानुसार भुसावळ बाजारपेठ पोलीस ठाण्यात गुन्हा क्रमांक २८६/२०२६ दाखल करण्यात आला होता.
गुन्ह्याचे गांभीर्य लक्षात घेऊन पोलीस अधीक्षक श्रीकांत धिवरे यांनी स्थानिक गुन्हे शाखेला समांतर तपासाच्या सूचना दिल्या. वरिष्ठ पोलीस निरीक्षक राहुल गायकवाड यांच्या नेतृत्वाखाली विविध पथके तयार करून तपास सुरू करण्यात आला. परिसरातील सीसीटीव्ही फुटेजची तपासणी तसेच तांत्रिक विश्लेषण करण्यात आले.
तपासादरम्यान गुप्त बातमीदारामार्फत मिळालेल्या माहितीच्या आधारे आरोपी नागपूर येथे असल्याचे निष्पन्न झाले. त्यानंतर स्थानिक गुन्हे शाखेच्या पथकाने नागपूर पोलिसांच्या मदतीने राजू जसपालसिंग (रा. हरियाणा), भोला उर्फ बिरेंद्र सुखदेव पासवान (रा. बिहार) आणि राजेश पारस शहा (रा. बिहार) यांना ताब्यात घेतले. चौकशीत तिघांनीही घरफोडीची कबुली दिली.
आरोपींकडून चोरीस गेलेले सोन्या-चांदीचे दागिने व रोख रक्कम असा एकूण १६.३४ लाख रुपयांचा मुद्देमाल जप्त करण्यात आला असून पुढील तपास भुसावळ बाजारपेठ पोलीस ठाणे करीत आहे.
ही कारवाई पोलीस अधीक्षक श्रीकांत धिवरे, अपर पोलीस अधीक्षक संदीप गावीत, उपविभागीय पोलीस अधिकारी केदार बारबोले यांच्या मार्गदर्शनाखाली वरिष्ठ पोलीस निरीक्षक राहुल गायकवाड यांच्या नेतृत्वाखालील पथकाने केली. या कामगिरीत पोलीस उपनिरीक्षक शरद बागल तसेच इतर अधिकारी व कर्मचाऱ्यांनी महत्त्वाची भूमिका बजावली.
हेडलाईन : १२ तासांत घरफोडी उघड; नागपुरातून तिघे आरोपी जेरबंद, १६.३४ लाखांचा मुद्देमाल जप्त
