भुसावळ : (निलेश फिरके) येथील जामनेर रोडवरील आदर्श हायस्कूल येथे संत निरंकारी मिशनच्या वतीने रक्तदान शिबिराचे आयोजन करण्यात आले. या शिबिराला रक्तदात्यांचा उत्स्फूर्त प्रतिसाद मिळाला असून शेकडो नागरिकांनी रक्तदान करून सामाजिक बांधिलकी जपली.
संत निरंकारी मिशनमार्फत मानवतेच्या सेवेसाठी १९८६ पासून संपूर्ण भारतात रक्तदान शिबिरांचे आयोजन करण्यात येत आहे.आतापर्यंत देशभरात १४ लाख युनिटपेक्षा अधिक रक्त संकलन करण्यात आले आहे.
मानवतेसाठी बलिदान देणारे बाबा गुरुबचन सिंह यांच्या स्मृतीप्रित्यर्थ दरवर्षी १० मार्च रोजी संत निरंकारी मिशन चॅरिटेबल ट्रस्टच्या माध्यमातून रक्तदान शिबिरांचे आयोजन केले जाते. “रक्त नाडियों में बहे, नालियों में नहीं” हा त्यांचा संदेश समाजाला रक्तदानासाठी प्रेरणा देणारा ठरला आहे.
भुसावळ येथे आयोजित करण्यात आलेल्या या रक्तदान शिबिरात मोठ्या संख्येने नागरिक, युवक व सेवाभावी कार्यकर्त्यांनी सहभाग घेत रक्तदान केले. आयोजकांनी रक्तदानाचे महत्त्व पटवून देत नागरिकांनी नियमित रक्तदान करण्याचे आवाहन केले.
