विजेच्या गरजेबाबत शिक्षक व मुलांमध्ये जागरूकता निर्माण व्हावी. म्हणून कार्यक्रम राबविण्यात आला..
पोलीस वार्ता, देवळाली | 2026 ‘राष्ट्रीय अभियंता दिन’ निमित्त महावितरण भगूर कक्षाकडून वीज सुरक्षा, हरित ऊर्जा, विज चोरी याविषयांवर समाज प्रबोधन कार्यक्रमाचे आयोजन दि.15 सप्टेंबर, मंगळवार रोजी करण्यात आले होते. याबाबत अधिक माहिती देताना भगूर कक्षाचे सहा. अभियंता सुरेश पाचंगे यांनी सांगीतले की, पहिल्यांदाच थेट शाळेत आणि नगरपरिषदेत जाऊन अशा कार्यक्रमाचे आयोजन करण्यात आले आहे. तसेच ‘अभियंता दिन’ आणि ‘गणेशोत्सवाचे’ औचीत्य साधुन काळाच्या बदल्या परिस्थिती नुसार आज अन्न, वस्त्र, निवारा नंतर अत्यंत आवश्यक अशा विजेच्या गरजेबाबत शिक्षक व मुलांमध्ये जागरूकता निर्माण व्हावी. म्हणून कार्यक्रम राबविण्यात आला.
आगामी नव्या पिढीला विजेच्या आधुनिक स्वरूपावर सोलर, पवन आणि इलेक्ट्रिक वाहन तसेच वीज सुरक्षा आणि हरित ऊर्जा या बाबत आणि विजेचे उपकरणे हाताळतांना घ्यावयाची काळजी व उपयोजना, सुरक्षेविषयी माहिती सहा. अभियंता पाचंगे यांनी दिली. त्यानंतर महावितरणकडून विद्यार्थ्यांनी विजे बाबत ठेवलेल्या प्रश्न-उत्तर मंजुषेत छोट्या-छोट्या भेटवस्तू जिंकल्या. कार्यक्रमानंतर विजेच्या सुरक्षेवर उपस्थित सर्व शिक्षक वर्ग आणि विद्यार्थ्यांनी शपथ घेतली.
तसेच भगुर नगरपालिका इथे नगराध्यक्षांची भेट घेऊन भगूर शहरातील समस्या आणि महावितरणाकडून होणाऱ्या उपाययोजना याबाबत नगरसेवक विशाल बलकवडे यांचेशी सविस्तर चर्चा करून नगरपरिषदेत महावितरणाचे “हे करा, हे करु नका” या आशयाचे ‘सुरक्षा बॅनर’ लावून नगरपरिषदेत देखील ‘वीज’ बाबत प्रबोधन करण्यात आले. लवकरच देवळाली कॅम्प परिसरात वीज बाबत तक्रार दरबार भरवण्याचे देखील पाचंगे यांनी सांगितले. नगरसेवक विशाल बलकवडे यांनी भगूर शहरात विजेच्या प्रवाहात सुधारणाबाबत समाधान व्यक्त केले आहे. भगूर नगरपरिषद महावितरणासोबत असून शहर भूमिगत करण्याबाबत वीज मंडळाकडे त्यांनी विनंती केली आहे.
