पाच महिलांविरोधात राजगड पोलिसांत गुन्हा दाखल.
भोर प्रतिनिधी :- राम पाचकाळे.नसरापूर : राजगड पोलीस स्टेशन हद्दीतील नसरापूर येथे एका सराफा दुकानातून सुमारे ६२ हजार रुपये किमतीच्या सोन्याच्या चमक्या चोरीस गेल्याची घटना उघडकीस आली असून, याप्रकरणी अज्ञात पाच महिलांविरोधात गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी विनय मिलिंद पंडीत (वय ३१, व्यवसाय – सोनार, रा. नसरापूर, ता. भोर) यांनी राजगड पोलीस स्टेशनमध्ये फिर्याद दाखल केली आहे. दिनांक १३ मे २०२६ रोजी सायंकाळी सातच्या सुमारास नसरापूर येथील “पंडीत ज्वेलर्स” दुकानात पाच अनोळखी महिला व त्यांच्यासोबत एक लहान मुलगा आले होते. त्या वेळी दुकानात ग्राहकांची मोठी गर्दी होती.
फिर्यादी व त्यांची आई ग्राहकांना सोन्याच्या चमक्या दाखवत असताना, काही महिलांनी त्यांना बोलण्यात गुंतवून ठेवले. त्याच दरम्यान एका महिलेने काउंटरवरील दोन पाकिटे दुसऱ्या महिलेच्या हातात दिली. पुढे ती पाकिटे सोबत असलेल्या लहान मुलाकडे देण्यात आली. त्यानंतर संबंधित महिला कोणतीही खरेदी न करता दुकानातून निघून गेल्या.
यानंतर दुकानातील मालाची तपासणी केली असता, ३० हजार रुपये किमतीच्या ६० सोन्याच्या चमक्या तसेच ३२ हजार रुपये किमतीच्या २४ सोन्याच्या फॅन्सी चमक्या असा एकूण ६२ हजार रुपयांचा मुद्देमाल चोरीस गेल्याचे निदर्शनास आले.
या प्रकरणी भारतीय न्याय संहिता (BNS) कलम ३०३(२) अन्वये गुन्हा दाखल करण्यात आला असून, पुढील तपास राजगड पोलीस स्टेशन चे पोलीस निरीक्षक राजेश गवळी यांच्या मार्गदर्शनाखाली पोलीस हवालदार तळपे करीत आहेत.
