भुसावळ : शहरातील स्टेट बँक मुख्य शाखेसमोरील परिसरात घरातील सामान घेण्यासाठी गेलेल्या विवाहित महिलेचा विनयभंग केल्याची धक्कादायक घटना उघडकीस आली आहे. याप्रकरणी संबंधित दीराविरुद्ध बाजारपेठ पोलीस ठाण्यात गुन्हा दाखल करण्यात आला आहे.
पोलिसांकडून मिळालेल्या माहितीनुसार, रोहिणी हर्षल सावकारे (वय २७, रा. मयुरेश्वर अपार्टमेंट, तुलसीधाम नगर) या दि. १३ एप्रिल २०२६ रोजी सायंकाळी सुमारे ५.३० वाजता जामनेर रोडवरील सावकारे बिल्डिंगमध्ये घरातील सामान घेण्यासाठी गेल्या होत्या. इमारतीच्या जिन्याच्या गेटला कुलूप असल्याने त्यांनी तेथे उपस्थित असलेल्या दीराकडे चावीची मागणी केली. मात्र, त्याने चावी देण्यास नकार देत शिवीगाळ केली व जीवे मारण्याची धमकी दिली.
यावेळी आरोपी मयूर संजयकुमार सावकारे (रा. सावकारे बिल्डिंग, जामनेर रोड) याने महिलेचा हात पकडून जबरदस्तीने स्वतःकडे ओढत लज्जा उत्पन्न होईल असे कृत्य केल्याचे तक्रारीत नमूद आहे. घाबरलेल्या महिलेने आरडाओरड करत स्वतःची सुटका करून घेत ‘११२’ या आपत्कालीन क्रमांकावर संपर्क साधून पोलिसांना माहिती दिली.
घटनेची माहिती मिळताच पोलीस घटनास्थळी दाखल झाले. त्यानंतर महिलेने बाजारपेठ पोलीस ठाण्यात तक्रार दिल्यानंतर आरोपीविरुद्ध विनयभंग व धमकी दिल्याप्रकरणी गुन्हा दाखल करण्यात आला आहे.
या प्रकरणाचा पुढील तपास पोलीस निरीक्षक राहुल वाघ यांच्या मार्गदर्शनाखाली पोलीस हेड कॉन्स्टेबल तेजस पारसकर करीत आहेत.
