भारताचे ‘सरन्यायाधीश भूषण गवई’ यांच्या हस्ते होणार नाशिक जिल्हा न्यायालयाच्या नवीन इमारतीचे लोकार्पण!

नाशिक जिल्हा व सत्र न्यायालयाच्या नवीन इमारत आणि वाहनतळ इमारत यांचा लोकार्पण सोहळा शनिवार होणार..

पोलीस वार्ता, नाशिक : शहरातील नव्याने बांधण्यात आलेल्या जिल्हा व सत्र न्यायालयाच्या नवीन इमारत आणि वाहनतळ इमारत यांचा लोकार्पण सोहळा शनिवार दि.27 सप्टेंबर 2025 रोजी सकाळी 9.30 वाजता संपन्न होणार आहे. सदर कार्यक्रम हा पोलीस परेड मैदान, पोलीस मुख्यालय, नाशिक येथे होणार असून विशेष बाब म्हणजे भारताच्या सर्वोच्च न्यायालयाचे नवनिर्वाचित ‘सरन्यायाधीश भूषण गवई’ यांच्या शुभहस्ते लोकार्पण केले जाणार आहे. यांसह राज्याचे मुख्यमंत्री देवेंद्र फडणवीस देखील या कार्यक्रमाला उपस्थिती लावणार आहे.

तसेच उच्च न्यायालय, मुंबईचे मुख्य न्यायमुर्ती चंद्रशेखर हे कार्यक्रमाच्या अध्यक्षस्थानी असून उपमुख्यमंत्री तथा नगरविकास, गृहनिर्माण, सार्वजनिक बांधकाम (सार्वजनिक उपक्रम) मंत्री एकनाथ शिंदे आणि उपमुख्यमंत्री तथा अर्थ व नियोजन, राज्य उत्पादन शुल्क मंत्री अजित पवार, उच्च न्यायालय मुंबईचे न्यायमुर्ती मकरंद कर्णिक, न्यायमुर्ती सारंग कोतवाल, न्यायमुर्ती जितेंद्र जैन व न्यायमुर्ती अश्विन भोबे हे सर्व सन्माननीय पाहुणे यावेळी उपस्थित राहणार आहेत.

प्रमुख जिल्हा व सत्र न्यायाधीश, नाशिक श्रीचंद जगमलानी व वकील संघाचे अध्यक्ष नितीन ठाकरे यांच्यात झालेल्या दि.24 सप्टेंबर 2025 रोजीच्या बैठकीनंतर जाहीर करण्यात आले की, या समारंभाच्या नियोजनासाठी वकिलांच्या 19 समित्या तयार केल्या असून प्रत्येक समितीत ज्येष्ठ व तरुण वकील आहेत. एकूण 350 वकील या समित्यांमार्फत कार्यरत असतील आणि कार्यक्रम यशस्वी करतील.