सिंहस्थ कुंभमेळा प्राधिकरणामार्फत 66 किलोमीटर लांबीचा परिक्रमा मार्ग साकारणार

भूसंपादन करताना ज्याठिकाणी व्यावसायिकांचे नुकसान होत असेल तिथे भरपाईचे मूल्यमापन संबंधित विभागाकडून करून घ्यावे..

पोलीस वार्ता, नाशिक : सिंहस्थ कुंभमेळा प्राधिकरणामार्फत 66 किलोमीटर लांबीचा परिक्रमा मार्ग साकारला जाणार आहे. या रिंग रोडसाठी शहरात एकूण 9 ठिकाणी भूसंपादन करावे लागणार आहे. आवश्यक भूसंपादनास मान्यता प्राप्त झाली असून भूसंपादन करताना ज्याठिकाणी व्यावसायिकांचे नुकसान होत असेल तिथे भरपाईचे मूल्यमापन संबंधित विभागाकडून करून घ्यावे. मोजणी पूर्ण करून भूसंपादनासाठी प्रस्ताव तातडीने सादर करावेत, अशा सूचना जिल्हाधिकारी आयुष प्रसाद यांनी दिल्या आहेत.

तसेच भूसंपादन हे एकाच वेळी करण्यासाठी समिती गठित करण्यात यावी. भूसंपादन करतांना प्रस्तावित विकास रस्त्यांवरील अतिक्रमणे काढण्याबाबत महानरपालिकेने कार्यवाही करावी. तसेच मार्गातील पोल महाराष्ट्र राज्य विद्युत वितरण कंपनीने तर महाराष्ट्र राज्य पायाभूत सुविधा विकास महामंडळाने येत्या 15 दिवसात रिंगरोडसाठी मोजणीचे एकूण 545 गटांच्या मोजणीसह पोटहिस्सा मोजणीही करावी. तसेच मोबदला प्रदान करण्यासाठी पोटहिस्सा धारकांचे संयुक्त बँक खाते उघडून संमतीपत्रही घेण्यात यावे. रिंगरोडसाठी जमीन मोजणी कामाला गती देण्यासाठी आवश्यक मनुष्यबळ उपलब्ध करून घेण्याच्या सूचना देखील जिल्हाधिकरी प्रसाद यांनी दिल्या आहेत.

या जिल्हाधिकारी कार्यालयातील मध्यवर्ती सभागृहात दि.6 डिसेंबर 2025 रोजी आयोजित आढावा बैठकीत महानगरपालिकेच्या अतिरिक्त आयुक्त करिष्मा नायर, उपजिल्हाधिकारी राजेंद्र वाघ, नाशिकचे तहसीलदार पंकज पवार, मुकेश कांबळे (दिंडोरी), अपर तहसीलदार अमोल निकम, महानगरपालिकेचे सहाय्यक संचालक कल्पेश पाटील, उपभियंता प्रशांत सोनवणे, महाराष्ट्र राज्य पायाभूत सुविधा विकास महामंडळाचे कार्यकारी अभियंता विकास महाले, सचिन चिंतावार, समन्वयक गजानन धुमाळ, प्रकाश गायकवाड, विकास जाधव आदी उपस्थित होते.