मयत संजय देशमुख यांचा अज्ञात व्यक्तींनी धारदार शस्त्राने डोके, तोंड व हातावर वार करून निर्घृण खून केला होता..
पोलीस वार्ता, भोर | पुणेच्या मौ. शिंदेवाडी हद्दीतील जुन्या कात्रज बोगद्याजवळ झालेल्या खून प्रकरणाचा राजगड पोलीस स्थानिक गुन्हे शाखेने अवघ्या काही दिवसात उलगडा केला आहे. या प्रकरणी दोन आरोपींना अटक करण्यात आली असून आणखी दोन आरोपींचा शोध पोलीस घेत आहे.
मिळालेली माहिती अशी की, शिंदेवाडी जवळील जुन्या कात्रज बोगद्यापुढे हॉटेल आमराईजवळ रस्त्याच्या कडेला दि. 11 जुलै 2026 रोजी रात्री मयत संजय बाबूराव कडू देशमुख, वय-40 वर्ष यांचा अज्ञात व्यक्तींनी धारदार शस्त्राने डोके, तोंड व हातावर वार करून निर्घृण खून केला होता. या घटनेनंतर फिर्यादी गौरव चंद्रकांत झेंडे यांच्या सांगण्यावरून राजगड पोलीस ठाण्यात गु.र.नं.- 264/2026 भा.न्या.संहिता कलम 103(1) तसेच शस्त्र अधिनियम कलम 4 व 27 अन्वये गुन्हा दाखल करण्यात आला होता.
खुनाच्या गुन्ह्याचे गांभीर्य लक्षात घेऊन वरिष्ठ पोलीस अधिकाऱ्यांच्या मार्गदर्शनात सहा. पोनि. चेतन मछले यांनी तपासाला गती देऊन तांत्रिक व गोपनीय माहितीच्या आधारे दि.14 जुलै रोजी संशयित आरोपी 1)मंथन दिनेश वैद्य (वय-25 वर्ष) आणि 2)सौरभ सागर परदेशी (वय-24 वर्षे) या दोघांना अटक केली. तसेच तपासात 3)मिझान सुदीन शेख (वय-32 वर्षे) व 4)संदीप बाबुलाल कोरी यांचा देखील गुन्ह्यात सहभाग आढळून आल्याने त्यांचा देखील शोध सुरू आहे. लवकरच त्यांना देखील अटक करण्यात येईल अशी माहिती राजगड पोलिसांनी दिली आहे.
